(کَولِ اِرشاد پَروازَئێگ ءَ)
مُشکوارێں شاہینے، رۆچکۆرَگێں گُگُّو، دْرُست یَکّ ھِساب ءَ اَنت
واجَہ ءِ گِس ءِ مِنڈُک، گُژنَگ ءِ دَر ءِ گُلُّو، دْرُست یَکّ ھِساب ءَ اَنت
بانکَلێنک ءُ گَندیم اَنت یا کہ کۆہَلێں ماکے یا کہ کَلَّرێں آپِشک
جۆش داتَگێں پِنڈال، لَہڈ داتَگێں آلُو، دْرُست یَکّ ھِساب ءَ اَنت
سْیاسَت ءِ ھَبَر کہ بیت نێست مَجال کَسّے ءَ دْرُست بُوٹّ ئے چێرا اَنت
کۆر بیت یا کَرّے، کانٹی بیت یا کُٹُّو، دْرُست یَکّ ھِساب ءَ اَنت
اَنچۆ ماں شِردێنتَگ مارا اِے گَٹَرگَنداں کہ دَمُوکَہ اِنت ھَرکَس
گیتّ بیت یا پُوپُو، مِسّ بیت یا سُوسُو، دْرُست یَکّ ھِساب ءَ اَنت
گَپّ اِنکِلابی ءِ، کار ءُ کِرد جَنگۆل ءِ، ٹَہک ءُ ٹۆک دَلّار ءِ
بے سَرێں بَٹاکُو اَنت، ھُشکێں آسُک ءُ دُودُو، دْرُست یَکّ ھِساب ءَ اَنت
یَکّے پیٹیائی اِنت، یَکّے اِنگلِش ٹیچَر، یَکّے بیت ھِڈماسٹَر
یَکّ بَچَکّے وانۆکێں، یَکّے ڈَلّ یا بُدُّو، دْرُست یَکّ ھِساب ءَ اَنت
<سترُنگ><اِم>مَنزُور بِسمِل