چَمّانی تَہا ما کێچ کُتَگ، دَستانی دِل ءَ بَمبُور کُتَگ
مئے سێنَگاں رۆک اِنت دَرد ءِ چِراگ، ھَر سِنگ ما کۆہِ تُور کُتَگ
دِل جاہے ءُ جاہے کُنٹ ءُ ھَیال، نام جاہے ءُ جاہے کِرد ءُ کَمال
وَت ءَ مێتَگ مێتَگ بَہر کُتَگ، ما مَرچاں وَتی دَستُور کُتَگ
ما دْرۆگ ءُ راست ءِ وانتَگ سَبَکّ، ما دیستَگ اَنت زِند ءِ رَنگ دوێں
کہ جاہے وَت ءَ پِرَون کُتَگ ءُ جاہے وَت ءَ مَنسُور کُتَگ
تَئی ناز ءُ اَدا ءِ دُنیا ءَ کُٹّێنتَگ وَتی رۆچ ءَ کہ سَپَر
بالێنتَگ دِل ءِ ھَر داگ وَتی، تَئی دامُن پُرّ چَہ نُور کُتَگ
ما رَنج ءُ بَژن ءِ تاہاپاں اَرسانی شَہکَور تاچێنتَگ
کہ مِہر ءِ جِنِکّ ءَ کَلمانٹێں وَہدے گۆں مُگێماں سُور کُتَگ
ھَر اَہد ءُ وَدار ءِ جَنگ ءِ تَہا پہ ما کہ نَمَنتَگ رُو ءُ رْیا
تَئی زاہِر ما اِنجیر کُتَگ، تَئی باتِن ما اَنگُور کُتَگ
تاں کَرناں گێدی ءِ دِلبَند ءَ تَئی دَرد ءِ کِسَّہ رۆک بِبیت
ما زِند ءِ سُتکَگێں میتاپ ءَ دِگِہ آسے پَدا جَمبُور کُتَگ
<سترُنگ><اِم>نِسار اِیسُپ