Bámáni Golén Cháderé Mán Pósh

Sayad Háshomi July 30, 2025 98 views

Wasshatk ay ji bát ent tará majlesay golpósh
Gón préshtagán háwand kotag gálán mani delgósh

Anchá watá sóchant, watá bréjant hasaddig
Gáláni marágáhán nabit bájbari chósh

Bésóbiay torsá kotant kastáni abéli
Shahgwashtenén shahmátán, wáb geptag kalágósh

Káyant pa mani majles o diwánán amiri
Áripén shakargál pa shimósh, pa delmósh

Zórbordiay shumjangáni thapp ázag ant angat
Macchet padá goddh kortagén maccháni sará kósh

Nókisag o kamkisag o darkisag o óstig
Zarjósh o habarjósh o kaparjósh o saparjósh

Báhóthiá nehengámay narawt zerday tahári
Rahdarbarén bámáni golén cháderé mán pósh

Kassé ke é rahdarbarén gálán cha zebahr ent
Watkósh ent o watkósh ent o watkósh ent o watkósh

Mán *pánzdah sadiá taw pa sardáriá mennay
Zár pa chóshén hóshá mazanhósháni mazanhósh

Móré ham nawárt góshá tai gósh kaptant shelengay
Bishkorretant pa bébonén báwasté kai gósh

Gazzáni newáná ay, gedrósháni mayár ay
Gár but golén Gedróshiá, mant bégolén gedrósh

Santh ent tai samá górom o sassáay ramag rong
Hoshk ent tai gálkásagay nokk, dósh satar dósh

Ludháni jakén rahtay mayár ent tai bonbár
Sóbáni golén zédán nabit mahri tai shimósh

Kamzánti o kamdidi o badgendi o hézi
Bégwáhiay pézhráh ant é hélán cha watá prósh

Kai mennat ent sarkondhán gón mán atkagant sinag
Kai konntá sakk ant mani pahnátán tai srósh

Trampé pa taw zendáp, cha áripiay tásán
Kastáni zerán tengay narawt ent tai haláhósh

Cha gandagén sassáyán tai zerdá zehénit
Byá pyálahé cha kihawén gáláni zerá nósh

Hecch báj nabárt ach maná goptáray Sekandar
Man kóróshán gáláni, nayán proshtagén Dáryósh

Bóhérén Sayad angarén gálán wati gwandh ger
Badzerday jagar bretkag, samá sotkag o pilósh

………………………………………..
*Pánzdah sadiá = Chárdahomi sadi bezán 1394 kotthagá ent o pánzdahomi sadi ent.

24-Agast-1974, Karáchi
(Shakkalén Shahju)

Sayad Háshomi

Hamrangén nebeshtag