Maná syáhén kóthé gwará ent o kárgeséá neshtagán. Yakké atk, áiá maná gosht ke kammo wadár kan. May dhárekthar annun kayt.
Man jost kot: "Shomay dhárekthar koj ent?"
Áiá gosht: "Dhanná segréthay kasshagá shotag. Bass pédák ent."
Á shot...
Mani chamm diwálay démá thangetagén paynthengá kaptant ke áiay tahá yakk kamáshé rékéay sará óshtátag o daryáay némagá cháragá ent. Á daryáyá anchó cháragá ent, goshay záná áiá wati zendagiá daryá nadistag. Man gosht ke pád káyán rawán paynthengá nazziká chárán. Anchó mardé atk. Cha áiay pocch o póshákán zánag bayagá at ke á ancháén mardomé naent.
Man áiay démá pád atkán. Áiá maná goláésh kot. Mardá gosht: "borén". Man áiay hamráh bután. Man o á lepthéá swár butén, borzá shotén. Áiá maná gosht ke: "É mani záti edárah ent. Man chágerday gehteriay háterá kárá án, bale mani edárahay sará kazáé kaptag."
Man jost kot: "Chónén kazáé?"
Áiá passah dát: "Shash máh ent ke man wati dazgatthiáni sawabá edárah wahd dát nakotag o edá nayatkagán. Nun ke man wátarr kotag ta mani edárahay drostén kampyutharáni láp porr ant. Man hayrán án ke nun é kampyutharán chón bekanán. Maná anchén mardomé lóthit ke é kampyutharáni chokkán dawr bedant."
Man gosht: " Man kampyutharay kárá nazánán, o choshén kár ham man hechbar nakotag."
Áiá anchó pa ajakkahi mani némagá cháret o gosht: "Godhá taw edá chiá atkagay?"
Man gosht: "Maná yakkéá goshtag ke é edárah wáb bahá kant. Man edá wábéay geragá atkagán."
Mani é gappá gón mardá wati lonth gatth pátkant o dast péshániá bort. Padá darráénty: "Hán taw geráké ay."
Man gosht: "Haw."
Má padá jahlá ér kaptén. Hamá pésarigén jáhá atkén ke man edárahay dhárektharay wadár kotagat.
Payntheng hamá jáhá thangetagat bale nun áiay tahá kamásh o daryáay aksay jáhá kasánén chokké at ke espétén apséá swár at, o mani némagá anchó cháragá at, goshay záná maná pajjáh áragá ent.
