Mizzán mizzáná mani wáb o hayálán cha dar á

Sayad Háshomi November 27, 2024 54 views

Del cha bandán tai andóh o gamán chó sestag
Ke man del gwashtag bale zyádagén drogé bastag
Éshiay oppáragán sálé o do shash máh gwastag
Yakk damáné bit ke dardáni dawárjáh trahetag

Mennatwár án tai éshiá ni mathóhén pa hodá
Mizzán mizzáná mani wáb o hayálán cha dar á

Wati malgórán mashengén maná bésár makan
Shahd o washzémelén gálán gón wati gár makan
Wáhag o dóstiá márá padá bigár makan
Chó maná trond machár o delá wáhdár makan

Dast bandán ke chamá ráhá boraw tarr padá
Mizzán mizzáná mani wáb o hayálán cha dar á

Dótkag góndhalán del hósh o hayáláni bezán
Tirbárán kotag mártinán shegánáni manán
Moddaté patkag jagar angar o sohrén ásán
Hoshk bát dozhmenay dast ér at tai zánsarán

Drost tai hamráh ant ni hejbar mani donyáyá mayá
Mizzán mizzáná mani wáh o hayálán cha dar á

Béryáén tai á kaddahén chammáni kamán
Thekky bastat pa mani sénagá bé wahd o gomán
Tránagá gwastagén perrénant maná saht o damán
Tá abad gár nabant kárigén thappáni neshán

Didagán áski mashán didagi sawgend ent tará
Mizzán mizzáná mani wáb o hayálán cha dar á

Chó mani bahtaygá shap pa kaséá syáh mabát
Kassi báládá gamáni choshén moshkol makapát
Gón taw Hánol mani é yakkén dwá hamráh bát
Wazhdelén koll tai delwáhén morádán gendát

Zir wati dátagén sawgátán pa wasshi o razá
Mizzán mizzáná mani wáb o hayálán cha dar á

Karáchi
Márch 1951

Sayad Háshomi