Taw Namirán Ay

Golám Hosén Shóház September 19, 2024 82 views

Tán hamá wahdá ke jahán hast ent
Tán hamá wahdá ke trepant estál

Tán hamá wahdá ke máh dah o cháray
Gédiay delbanday sará drapshit

Tán hamá wahdá ke róchay rozhnái
Harch shapay allam dar kapit démá

Tán hamá wahdá ke kapót tahná
Makkahén darbanday gámig, nálant

Tán hamá wahdá ke zerá nillén
Hast bant chawl o zitproshókén gwarm

Tán hamá wahdá ke chenál Kéchay
Sassiay zaymén tránagán géjant

Tán hamá wahdá ke kóth Nasir Hánay
Mán Miriá ráji daptarán mánit

Tán hamá wahdá ke Shálkóth ganjén
Cheltán o Mordáray hodábond ent

Tán hamá wahdá ke surmagén Bólán
Wat negahpán ent góragén kolláy

Tán hamá wahdá ke Siwiay bázár
Shakkalén sittáni wadhálig ent

Tán hamá wahdá ke kahir menjén
Mán lad o gwáshá pa wadhé loddhant

Tán hamá wahdá ke tásopén bacché
Pa makkahén mátigá zarit sahté

Tán hamá wahdá ke ádamizáté
Talwasit pa mehráni golén námá

Tán hamá wahdá ke abétkén del
Raptagén bárigay dawárjáh ent

Tán hamá wahdá ke Dokormá cha
Mallagén Parháday sedant chihál

Tán hamá wahdá ke Jawánsálay
Gédiá mánant goshtagén goptár

Tán hamá wahdá ke ars hólombén
Shép gerán bant cha didagén bazhnén

Tán hamá wahdá ke kudhawén embróz
Pa shapjatén ozrá koht o bazhnig ent

Tán hamá wahdá ke shepánké may
Tihor o mátbandi saré neshtag
Shánk dant chammán pa golén dhéhá
Allamén lékit watá wali o wáres

Tán hamá wahdá ke Nillagá bráhit
Nám mazanmarrén mirén Dád Sháhay

Tán hamá wahdá ke sokansanjén
Pázolay gáláni tawár hast ent

Tán hamá wahdá ke zánt pasht kaptag
Tán hamá wahdá ke hósh barjáh ent
Sad hazár drógbanday tahá yakké
Rástiay pákén dán bedant goshtánk
Taw bezán hast ay, taw namirán ay
Taw namirán ay ke rástiay rahshón
Taw abadmán ay, taw abadmán ay
Taw namirán ay, taw namirán ay

Golám Hosén Shóház