O Padá Kapódar Metthué But
Wahdé hayál gappáni hamradári maknat godhá gap pitári bant. Anchó bé kárá mardom dhambarit. Johd kanán ke pa gappán hayálé o pa wat káré beshóházán.
Kár, kárá delá kapódaray dáragay ómán but. Chónáyá kapódaray hobb maná cha yakk anchén hankénéá but ke odá sabzén darámad molki espétén kapódar dáragá etant. Sabzén darámdáni choshén chatté nést at ke áiay sará espétén kapódaré taw nadist. Agan chattéay sará taw espétén kapódar nadist, bezán á nábudé.
Molki espétén kapódaráni wati yakk bálé at o dábé at. Haryakké cha domigá báj baragá wati bálán boster kanag o wati sabzén darámadáni wassh kanagá shartay katthagay johdá at. É espétén kapódaráni nezóri áháni pádáni mohrag etant. Espétén kapódar pa rang parangién mohragán o sabzén darámad pa espétén kapódaráni borzén báláni mozzán.
Hamé darámadén kapódariáni mozzáni padá mane nókén darámadá ham kapódaray dáragay hobbá gwar jat. Wati manná man ham dast o pád janag bená kot o chó sabzén darámadán wati mohragán kamáyán o pa espétén kapódarán móchkén kanán etán. Yakk o do lang o yacchamm o porshtabánzol nendán at ke wahday syahgwátá bál dátant. O maná diry dawr dát, anchó dir ke ke koll padi butant. Ché espétén kapódar o ché sabzén darámad, hecch pasht nakapt. Bass borzá espétén ázmáné at o jahlá sabzén zeminé.
Espétén ázmánay chéray sabzén zeminay saray kapagá pad ke bód kot ta zamángá hawár rang o dróshom, zéd o dawár koll matth etant. Rang o buáni yakk dege donyáé. Hamé rang o buáni tahá tarrag tarragá mani pádáni démá yabbará syáhén pazzórén kapódaréá kaperrag jat. Man kapond kot gerány, bale bály kot. Bale mani béhálén dely padá pa kakpódaréá mán kot. O man kaptán hamé kapódaray pad o randá. Patthag patthagá kapódar man yakk sengi kolléay kóday kalandhiáni sará dist. Gón kapódaray gendagá man wati móchkénay chandhag bená kot. Dán haminchoká cha sengi kollay kánchén darigá do espétén dhalagén chamm zandhén aynakéay thahá latth but.
Cha darigá zandhén aynakay tahay espétén chammáni latth bayagá názorkén lonthán bechkandé póshet. Kapódará bál bast atk pádáni démá…!
Chamm soretant, lonthán wati bechkand sar chet. Mósom matth but. Kapódar angat gón wati chénkán at.
Darig band but. Espétén dhalagén chamm gón zandhén aynká andém butant. Kapódará watárá matth kot o metthué but. Góyáky áort o zobány megrázé but. Yakk anchén megrázé ke bass chenán o réchán at. É anchén zobáné at ke áiá Balóchiay gédi kessaháni goshten: “Dantán haddhé, zobán góshté agán mán adhet, maná mayár nést.” Anchosh lapáshán kot ke hecchi sar nayáort. “Sad katthit zobán, sad babá dant zobán.”
Zobáná wati kár kot. Róchay hamá róch man kapódaray dáragay nám nagept.
Hasá Bejjár