Domi dar
Hótmán o Dashtiay Petáni Mirás
Torsay jágahá kawr ham kocch jant, ensán wa ensáné. Shambehá wáki cha Albalushiay kaptagén habaráni torsá dán say haptagá wati wizáay hál nagept. Bass chó hará káry kot dánke pa wati sapará zarr o marré bechent o ér bekant.
Wahdé say haptag sarjam but nun dely dásht nakot. “Bándá yakshambeh ent, zalur Albalushiá pawn kanán.”
Cha kárá atk shámy kot, wábi gólié wárty, kammé jawadhety o wapt.
Bángwáhá Shambehay pawná tawár kot. Cha wábá godhet hayrán but ke é wahdá kay pawná ent? Áiá dast shahár dát ke pawná band kanán, padá hayály kot, balkén mani jan o chokk bebant? Balkén Albalushi bebit? Yakk chammé pach aty o yakké band, pawny gept.
“Byá ke maná Hótmáná jatag marchi.” É Shambehay sangat Dashti at, cha Jarmaniá pawná at.
Hálánke Shambehá eshkot ke Dashtiá ché gosht, bale báwary nabut ke Hótmán chón Dashtiá jant? É sangat ant. Har paym nátepák bebant yakdomiá najanant.
Shambehá wati chamm latártant o gosht, “Padá bogosh tará kayá jatag?”
“Hótmáná.” Dashtiá gón larzókén tawáré gosht.
Goshay Dashti gréwagá at.
Shambeh berr at, nazánagá at ché bogoshán. Bale zut tránagá kapt ke é paymén jáwarán má Goru ham pawn kotag.
“Taw gón Goruá hál kotag?” Áiá Dashti jost kot.
Goru, Shambeh o Dashti o Hótmánay sangaté at, Karáchiá pasht kaptagat johdá at ke Yuropá borawt.
Dashtiá padá gón larzókén tawáré gosht, “Man dah dwázdah randá Goru pawn kotag, pawná chest nakant. Bárén áiá zyáratéay sará gón malangéá charsé kasshetag o wáb kaptag?”
Shambehá kambal dur kot, tahtay sará nesht o goshty, “Sharr ent Goru charsé kasshit o wáb kapit, shomay paymá syásat nakant o wat yakk o domiay gotthá nagipt.”
Dashtiay kerrá gádhiáni girr o gáray tawár at, sharriay sará naeshkoty ke Shambehá ché gosht.
“Padá bogosh, taw ché gosht?” Dashtiá Shambeh jost kot.
Shambeh cha tahtay sará pád atk, chammy pawná kaptant ta disty ke Dashti rassh o kasshén daggéay kashá pád janagá ent. Áiá baygé baddhá ent, sakk hawr ent, gody missetagant, sártiá jatag, larzagá ent.
Shambehá Dashti é hálá dist hayrán but ke molká Dashti garib o wár at, bale chó bazzag naat. Annun Jarmaniá ent, angat chó bélógén mardomá bad-hál ent.
“Boraw, pa watá bápén jáhé shóház kan, árámay sará habar kanén.”
Dashti bápén jáhéay shóházá shot o Shambeh dém pa pasilá.
Shambehá pasilay layth rók kot, layth rók nabit. Naly pach kot, garmén áp nést. Dasty hitharay nazziká bortant, hithar ham kárá naent. Áiá gón sártén ápá chamm shosht, norondhán but o shot kóthiá.
Anchóke kóthiá potert, chammy darigá dhann kaptant. Disty ke dóshi kammé barp butag, lógáni sar o drachkáni sháhadh chó pokkiá espét ant. Chammy pahk kotant o gón wat habará lagget:
“Óhe mani nádánén sar. Wahdé man molká atán, chónén wáb kamátagat. Allam darmolká rawán, wati molká ázát kanán o darmolkay wasshén mósom o zébáén nedáragán delwasshi kanán. Nun ke darmolká án, na syásat kanagi án o na zébáén nedárag del o jáná kapant. Syásatay démá Hodá bezánt bale zébáén molkay cháragay dém man wat syáh kot. Anchén lógéá sar kaptag, na layny mán o na gays. Anchén métagéá neshtagán kassá Lyáriá inchok géngwár nadistag, edá gendit. É paymén jágahán chón delwasshi kanag bit…”
Á angat jawadhagá at, anágatá tránagá kapt ke man pawnay sará mardomé nádéntag.
Á goshád goshádá dém pa pawná shot.
“Hán Dáshti! Taw bápén jáhé dar gétk?”
“Haw. Kahwáé ham pa wat bahá zort.”
Nun Dashti bápter at bale angat larzagá at.
“Hál kan, shomá parchá dáwá kotag.”
“Agan tará wahd hast man sarjamén kessahá kárán.”
Shambehá thémb cháret o darráénty, “Byár kessahá.”
“Godhá gósh dár.” Dashtiá cha kahwáyá gotthé gept o habará lagget:
“Do say máh at Hótmán mani sará kaptagat ke dér ent may asáelamay kés pás butagant, nun má báyad ent sarkári lógán yalah bedayén. Anchén shahréá benendén ke ódá báz Balóch bebit. Ódá mardom sharrén syásaté kot kant o gón Balóchán géshter nazzik ham but kant. Man dán báz wahdá dodelag atán. Bale maná zóry dát, man ennán kot nakot.
Gwastagén haptagá áiá maná pawn kot o gosht ke man lógé dar gétkag. Lóg yakk Nawambará hálig bit. Bale yakk o do róch pésar rawén, ódá gón lahtén sangatán dochár kapén.
Maná shumiá jat, báz pegr nakot o sarkár hál dát ke shomay lógá Nawambaray yakk táriká yalah kanán.
Say róch pésar Hótmáná padá maná pawn kot o gosht ke wahdé man o taw dém pa dém bén maná gón taw jédhahéay sará habar kanagi ent ke maná paréshán kanagá ent. Man gosht ke agan tará chizé paréshán kanagá ent, áiá delá madár, géshter paréshán bay.
Yabbaré áiay delá naat bale é habar áiá béwár kanagá at godhá goshty, ke lahtén róch bit mani deshtárá say tawárband mani sará ráh dátag. É tawárbandán mani saray wáshal chakarréntagant. Man é habará báwar kot nakanagá án ke wáki é pirén mard choshén kerdagár kant.
Man jost kot ke záná é pirén mardá ché kotag ke tai saray wáshal chakarretagant?
Goshty ke jostá makan. Maná laj kant ke é marday námá begerán.
Man gosht ke nun taw ápos kotag godhá záény.
Goshty é ke mard may námdárén ezmkár, Delip ent ke nonnokén chokkéay paymá mani deshtáray kerrá gerry bastag ke agan tawe Mehri pakká goshay ke man delér o ázátayálén mardomé án o shapay nespá tai Payzbokk o Eksay láebán gósh dárán o wati trondén pet o brátáni kerrá natorsán godhá hamé annun wati aksé maná ráh beday nun zánag bit ke taw wáki asaliá delér o ázátayálén mardomé ay. Agan taw chosh makanay godhá taw pakká lagór o tangnezarén mardomé ay.
É pirén mard Yuropá neshtag, harróch cha wati Payzbokk o Eksá láeb bit o Balóchestánay warnáyán lekchar dant ke Pákestán márá chokchén kanagá ent. Má báyad gón Pákestáná anchosh bekanén. Saray badal sar, chammay badal chamm, dastay badal dast, páday badal pád. Hamé paymá Balóchestán ázát but kant. Warnáiá má wati sóshal médhiáyáni própáel o ketáb o kápiáni posht o dém, é paymén lidhar o dáneshwaráni aks o esthikarán gahéntagant ke é may molká ázát kanant. Nun má zántag é wájakár róchá Balóchestáná ázát kanant o shapá wati hawassá.
Man lóthet ke sangatá tasallá bedayán dánke watá báz paréshán makant, bale sangatá maná habar kanagay móh nadát. Goshty ke annun é habará bell, wahdé dém pa dém bén tará Delipay tawárbandán gósh dárénán nun maná sójé beday ke ché bekanán.
Godhá parandóshi má wati nókén métagá shotén, ódá sangatéay mehmán butén. Sangat kárá zhand kotagat, mahlah wapt. Randá man o Hótmáná Delipay tawárband gósh dáshtant o dán dérán sakk kandet.”
“Godhá taw Hótmánárá sójé dát?” Shambehá Dashti jost kot.
Dashtiá passaw dát, “Ennán, áiá maná jost nakot o man béhál atán. Bale man gón áiá kessahé kot, hamé kessahay sawabá áiá maná jat.”
“Chónén kessahé taw kot?” Shambehá zánt ke Dashtiá wati locchén kár kotag.
Dashti larzénán but o shot dege kahwáé zorty o atk o habará lagget:
“Wahdé Eltáp Bái nók nók Emkyuemay sarók bit, sakk zórmand o námdár bit. Harwahdá ke á sáhig bit marchi sharrangén janéné mani mellagá pédák ent, á wati daptaray darwázagá ánjagé bandit. Wahdé janén daptará poteragá bit Eltáp Bái janénay ánjagay némagá eshárah kant o gón trondén tawáré goshit ‘ánjagá bój o byá’.
Agan janéná gosht parchá man wati ánjagá bobóján godhá Eltáp Báiá passaw dátagat ke shábásh, man anchén delérén kárkon lóthán ke maná ham thikáthik jawáb dát bekant. Agan janéná cha Eltáp Báiay trondén tawárá torset wati ánjagy bótk bezán á róchá Eltáp Báiay tamáshah at…
Wahdé má Delipay sará kandag o maskará kanagá atén, maná shumiá jat man hamé kessah gón Hótmáná kot o gosht ke wati deshtárá bogosh sambál bekan Delip gón taw Eltáp Báiay laybá kanagá ent. Bezán sangatá mani é habar dóst nabut. Maná yakk o do randá goshty ke taw nun géshén kanagá ay. Ched o dém maraw. Man ham dege géshén habaré nakot. Má waptén.”
Nun Shambehay kóthi sárt bayagá at. Áiá lóthet ke Dashtiá maylán wati habarán drájkassh bekant, borawán pa watá ham bápén jáhé shóház bekanán. Bale goshay Dashti o Hótmánay kessahá tazhn o bechakandé mán at. É tazhn o bechkand Shambehá damáné cha wati janjálán béhál kanagá at.
“Godhá démá ché but?” Shambehá chokkáni wadhá jost kot.
Dashtiá wati doén dastani mokk thébalay sará ér kotant o wati sonthy doén dastáni mocchán ér kot. Purah nun Dashti balloké at o pa wati nomásagá kessahé áragá at:
“Bale. Sohbá mahlah Hótmán pád atk o wati deshtáry pawn kot o Eltáp Báiay kessahy áort. Áiá wati deshtár habar o hakkal dát.
Hótmánay kukárán maná cha wábá godhént. Maná Mehriay sará bazzag but o watá malámat kot ke man báyad ent Eltáp Báiay kessah gón Hótmáná makotén. Wahdé Hótmáná wati pawn halás kot man gón áiá gosht ke é tai deshtáray radi naent. Taw wati meskinén deshtárá inchok habar maday. Bass áiá bogosh ke Delipá bolák bekan. Kessah halás. Hótmán padá mani sará zahr gept o goshty ke é mani gayrat o nangay habar ent. Taw watá cha é chizá dur bedár. Man padá hámósh bután o hecch nagosht.
É habarán o rand may sangatá márá harazbandé wárént. Harazbandá rand, má dhanná shotén o kammé tarr o táb kot. Bégáhay wahdá má dege sangatéay lógá mehmán butén. Cha má pésar ódá dege hapt hasht sangat nendók at. Má diwán kot. Jahká jik but. Sharáb o kabáb but. Syásat o dáneshwari but. Lahtén sangatá gosht ke báyad doén Balóchestán, bezán róbarkati o ródaratki Balóchestán yajjáh ázát kanag bebant. Dege lahtén sangatá gosht ke ennán yabbaré yakk Balóchestáné ázát kanag bebit o randá domi. Yakk o do sangatá gosht godhá saymi Balóchestán? Bezán Awgánestánay Balóchestán? Godhá dege yakk o do sangatá gosht ke may é lidharáni dastá yakk Balóchestáné ázát nabit. Shomá do say Balóchestánay habará et. Hótmáná hamé wahdá kashokáni Delipay pocchok ham shoshtant, bale sangatán nazánt ke Hótmán kayá goshagá ent.
Diwáná rand sangat yakk yakká wati lógán shotant. Má panch sangat sar atkén.
Man o Hótmán yakk kóthiéá waptén o say sangat dege kóthiéá. Sohb but, Hótmáná padá wati deshtár pawn kot. Man ham cha wábá pád atkán. Wahdé doénáni habar halás butant o dege habaresh dast nakapt, Hótmáná yakk randé padá gón wati deshtárá Eltáp Báiay kessah kot o habar o hakkaly dát. Bazzagén Mehriay gréwag o hiskáragáni áwáz man cha pawná dhann eshkotant. Man watá géshter mayárbár kot. Hótmáná pawn band kot o maná kemáry nakot o shot pasilá. Man jédhagá atán ke wahdé Hótmán cha pasilá dar kayt man cha áiá mápi lóthán o é ham goshány ke Mehri Delipay chokkiá rawá bit, é Mehriay radi nabutag é Delipay radi ent. Taw dam pa saht Mehriá hakkal maday, á delá kárit.”
Nun Dashtiá ballokáni paymá nendag halás kot. Watá korshiá tekahy dát o cha kahwáyá gotthé gepty o wati habary démá bortant:
“Hótmán anchóke cha pasilá dar atk, chó warókén kochekká mani sará enzáry bast. Wájah mani delbanday sará nesht o wati yakk dasté mani gotthá sakky dát o gón domi dastá mani démy shahmát pa shahmát kot. Man chárpádag atán. Hecch soret kanagá naatán.
Kesás darzené shahmátá rand gorráná goshty ke é mani gayrat o nangay maslah ent. É bárawá trekkag nakanay. Man lóthet ke bogoshán ke mardomay dast ke hará narasit, korragá pálám kant. Tai dast Delipá narasit, zahrán mani o Mehriay sará kasshay. Bale man sáh kasshet nakanagá atán, habar wati jágahá.
Anágat man hayál kot ke man diwálay nazziká án. Man chár panch randá diwál gón zórán jat. Cha domi kóthiá sangaté tacháná atk. Áiá márá dist habakkah but ke má dóshi brát o sangat atén, annun chón dozhmen butén?
Man hilaté Hótmánay dast cha wati gotthá dur kot o jaldi jaldi gosht ke é mardá cha mani sará dur bekan ke man mortán. Sangatay damág kárá naat ke ché bekant. Godhá man sangatay nám gept o kukár kot ke jaldi bekan ke man mortán. Sangatá ke maná kukárá dist, wat ham kukárá lagget, Hótmán! Yalah day wati sangatay gotthá. Tai sangat merit, má bannám bén.
Bale Hótmán maná yalah dayagay wadhá naat. Nun á cha kochekká gwastagat o chó oshterá bóláragá at. ‘Marchi tará zend mát ent.’
Sangatay damág kárá naat. Shot domi sangaty áort. Domi sangat atk. Á ham kukár kanagá lagget ke Hótmán! Shomá dóshi yakkén káshiay tahá warag wárt, yakkén gelásay tahá sharáb wárt o yakkén segréthay tahá chars kasshet, annun chón wat mán watá yakk o domiay gotthay hónán et?
Bale Hótmán maná angat yalah dayagay wadhá naat. Nun bóláragy halás kotagat. Bass Torbati gókay paymá mani delbanday sará neshtagat. Maná shahmát pa shahmát kanagá at.
Man padá kukár kot ke sangatán é mardá cha mani delbanday sará dur bekanet.
Domi sangatá ke maná chó kukárá dist, shot saymi sangaty cha wábá pád kot o áort. Saymi sangatá ham dege hecch nakot o bass kukáry kot ke Hótmán! Taw dóshi goshagá atay ke má sayén Balóchestánay Balóchán yajjáh kanén. Yakk Balóchestáné jódh kanén. Jahndam cha sayén Balóchestánay Balóchán yajjáh kanagá, taw wati jenday brátay gotth geptag.
Mani del kammé dhadhter but ke balkén é sangatay habar Hótmáná kár kanant. Bale é wahdá Hótmán na wati dóshigén habaráni soddá at o na áiá mani ezzatay hayál gwar at ke man pirá pir nókén sangatáni démá chárpádag atán.
Nun man wati chamm sayén sangatán sakk dátant o báz kukár kot ke agan shomá é mardá cha mani sará dur makanet, man pakkáyá merán.
Áherá sangatán hemmat kot, démá kenzetant o bázén ger o chiléá rand áyán Hótmán cha mani sará dur kot.
Hótmán sangatán dáshtagat. Man zut pád atk o pashal pashalá dém pa lógay darwázagá shotán ke wati buthán pádá kanán o dhanná rawán, sártén gwáté warán ke mani dam dar áyagá naat. Man buthán pádá kanagá atán ta gendán ke Hótmán cha sangatáni dastá lagoshtag o chó kochekká mani némagá sestag o pédák ent. Man jédhet agan Hótmán é randi padá kochekk o oshter o gókaygá mani sará orosh bekant nun man pakkáyá merán.
Deléá gosht ke Dashti wati buthán dastá kan o betach ke taw molká pawjiáni dastá namortay, darmolká wati sangatay dastá meray, o dege deléá gosht ke tachag aybé, agan taw tatkay dán zendagay é sangatáni démá bannám ay. Goshay kaséá maná gosht ke tachag dege kojám ent? Taw cha margay torsá cha jangá tatkay, cha molká tatkay, cha wati aziz o wáresán tatkay. Á tachag aybé naat, é tachag aybé?
Man angat shash o panchay tahá atán. Anágatá lógay ganthiá tawár kot.
‘Má polis én, lógá pach kanet.’
Man lóg pach kot. Darzené polis lógá potert. Esháni tahá yakk mardéá polisay god gwará naat, kukárá lagget ke dóshigén ent, é panahgirán márá bazzag kotag. Eshán dóshi páthi kotag o may wáb haráb kotag. Annun jangá ant, may chokk deltrakk ant. É angat neshah ant. Eshán dazgir kanet, cha may molká dar kanet.
É mard may mézbánay hamsáheg at. Rást goshagá at ke wáki shapá may syásatá eshiay wáb haráb kotagat o sohbá may jangá. Nun may drostáni shalwár cha gutá porr butant, chó mabit ke polis hakk o del márá molkbadar bekanant.
Polisán márá wati gádhiá sawár kot o tánahá bort. Márá kóthiéay tahá pa say chár ganthahá bandesh kot. Randá may kerrá atkant o goshtesh ke gendagá nun shomá neshah naet, balkén dóshi neshah butaget o mardománi wáb haráb kotag. Annun borawet bale padá é paymén kár makanet.
Má ke cha tánahá dar atkén, shotén sangatay lógá wati bayg zort o dar kaptán. Nun nazánán kojá borawán. Sarkári lóg man yalah dát. Gón Hótmáná wa nendag nabit.”
Wahdé Dashtiá wati habar halás kotant, Shambeh jédhagéá kapt ke wáki man annun asali kessahé eshkonagá atán yá é bass pelem o ketábi kessahé at ke Dashti gón man kanagá aty.
Shambehá wati warnáiay wahdá é paymén kessah o kerdár ketáb o támoráni tahá wantag o distagatant ke molkéá shóreshé bendát bit, lahtén warná pa zánt o lahtén pa nazántkári gón shóreshá gón kapit. Kammé wahdá rand shóresh mazanén jangéay tahá badal bit. Lahtén warná jangay bendáti róchán janag bit, lahtén dazgir o bégwáh kanag bit. Lahtén jangá démá bárt, lahtén darándhéh bit. Lahtén molká o lahtén darmolká syásatay sawabá nátepák bit o wat mán watá jang o dáwáyá laggit...
Bale nun pánzdah bist sálá rand, goshay é ketábi o támori kessah o kerdár asaliá Shambehay zenday tahá bayagá atant.
Shambeh tachit o é kessah o kerdár Shambehay randá gón ant.
Hasht sál ent Hótmán o Dashti Jarmaniá shotagant, hamá ent wat mán watá adhetagant. Harwahdá ke medhant godhá Wathsapay sará baré Hótmánay yá baré Dashtiay pawn chotthetag ke byáet may sohl o saláhá bekanet, má adhetagén.
Shambeh Wathsap grupay kálá bendát kant o Goru bongappay jendá. “Hán shomárá chón ent? Yakké márá wa Pákestáná kosht o domi shomay harróchigén adh o kodhán. Shomay petáni mirás bahr nabit. Bárén marchi shomá ché kotag?”
Agan á róchá Hótmán myárig ent, Dashti wati tahlocchén kandagá jant o gón Hótmáná goshit, “Dege wahdá taw may gósh karr kotagant, nun trekkag nakany?”
Agan á róchá Dashti myárig ent, Hótmán wati dastá delbandá jant o segréthé rók kant o gón Dashtiá goshit, “Nun habar kan, parchá gong ay?”
Dashti gón tahlocchén kandagé wati habarán bendát kant:
"Sharr wájah! Taw ke maná móh dátag godhá man wati habarán diwánay démá ér kanán. Sangatán, gapp chosh ent. Bezán dóshi man gón lahtén syási sangatá Eksay espaysá atán. Má dán dérán nesht o chágerdi o samáji sárháláni sará habar kot. Wahdé may sarhál halás butant, espaysay mardom kamm butant. Nun má bass lahtén pajjárókén sangat sar atkén. Má Balóchay annungén syásatay némagá atkén. É sarhálay sará ham má dán dérán rapathet. Hamé rapathagáni myáná man Hótmánay lidhar, Nawáb Sáhebay pocchok kammok shoshtant. Anchóke má diwán halás kot hamá damáná maná Hótmáná pawn kot o bázén bad o radé kot.”
“É wa sarjamén gapp naat, sarjamén gappán bejan.” Modámay paymá Hótmán gappay tahá dawr kant o goshit.
Parcháke Dashti hejbar awali randá wati sarjamén kessahá nayárit. Áiá torsit ke man yakk randé padá Hótmánay dastá bad o rad mawarán. Dashti gón Shambeh o Goruá dazbandi kant ke man hamá shartá sarjamén kessahá kárán ke padá bad o rad kanag mabán. Shambeh o Goru chó káziá áiá delbaddhi dayant ke nun taw may hakdiwáná ay, tará Hótmán hecch nagoshit.
Dashti wati habarán démá bárt:
“Wahdá may métagá molláé hast at, áiay nám Mollá Barkat at. Anchóke áiá pajaray nomáz kot, wati baythekay dapy pach kot o nesht. Sajjahén róchá áiay baytheká hapógiáni rawwá at.
Hapógián wadh wadhén jédhah gón at. Agan kwahnén hapógé bezán bonjané at godhá áiay gapp esh at ke hamá ent mani mardá domi jan geptag, mani lógay dapá nayayt. Goshay mani lógay dapá garrién kochekké mortag. Máná anchén táidé beday ke mani mard gón man péshay wadhá bebit.
O agan nókén hapógé at godhá é wástá atk ke mani marday delá mani némagá betarrén. Belly á wati pésari jan o chokkán yalah bedant. Agan mani mard chosh makant, mani lulok máná yalah nadayant.
O hamáyán ke hapógiay tors at bezán áyáni mard dege janéay geragá delmánag atant, áyán é wadhén zang jat ke hamá ent man eshkotag ke mani mard dege janéay geragá sar geptag, mani sar bál ent o del larzit. Na man wati lógá nesht kanán, na wati mát o petáni lógá. Man Torbat o Karáchiay dáktar halléntagant, bale angat dráh nabán. Mani goddhi omét awal Hodá o domi taw ay.
Mollá Barkatá é janén kammé zarr geptag o band o táid o dam o chup kotagant. Agan lahtén janén cha band o táid o dam o chupá dráh nabutag godhá Balóchi dawá darmánesh dátagant. Agan angat é janén wassh o dráh nabutagant áherá andará kotagantesh. O lahtén band o táid o Balóchi dawá o darmánesh dam jatag o dátagantesh ke haptag haptagéá yá do do haptagá watá andará bekanet. Shomárá kass magendit. Shomay mard ham shomárá magendant. May damagay dojani harwahdá Mollá Barkatay sará chó gonjá zahr butagant.
Nun lahtén sál bit goshay Mollá Barkatá Nawáb Sáheb ham andará kotag. Wájah moptá Balóchay lidhar ent, Balóch latthán kosht, bale wájah gendag nabit. Má, bezán las mahluk chó dojaniá én. Sar sar janén, may lidhar gendag nabit.
Má Karáchiá wánagay zamánagá kálej o uniwarsethiay kelásán rand sajjahén róchá Lyákat ketábjáhá neshtag o Tawár akbárá Nawáb Sáhebay hezhmgerén bayán o nebeshtánk wantagant o watá darándhéh kotag. Marchán ke Eks o Payzbokk o Enesthagrám o Thekthawk o barén dege ché chéay dawr ent, bale Nawáb Sáheb gendag nabit. Agan man drógband mabán 27 Márch, 11 Agast, o 13 Nawambará abayd Náwab Sáheb dege hecch róchá gendag nabit.
Bass hamé róchán wájah Thwithé Thwithé kant o rawt, bezán áiá wati parz purah kot. Hodá zánt ke wájah ché kanagá ent, bale annun é habará bazzagén kawm sharr zánt ke márá latthán kosht bale may lidhar gár ent.
Mani habar bass hamé butagant.” Dashti tahlocchén bechkandagé jant o hámósh bit.
Hótmán zahr gipt, segréthá suth pa suth kant o goshit, “Sangatán! Nun shomá wat bogoshet, é sharrén habar ant ke Dashtiá kotagant? É mardá wati dapay sodd nést.”
Har syási warkaray delá mani lidhar donyáay tahá sharterén lidhar ent. Dashti kojá wati sanjá jahl kant.
Shambeh o Goru lóthant ke habaré na habaré bekanant bale Dashti modámay wadhá tahá dawr kant o goshit, “Bechár Hótmán! Taw é gappá hejbar majan ke maná wati dapay sodd nést. Tará záná kojá wati dapay sodd hast? Gwastagén haptagá taw Eksay espaysá mani lidharay pet o pirok nanázéntant?”
Nun Hótmán wati habará bendát kant:
“Man wa badén habaré nakotag tai lidharay bárawá. Man bass hamé goshtag ke tai Medhelkelásén lidhar, Ali Guniay chokk ent. Ali Guni, Wali Mokchatthay chokk ent. Wali Mokchatth, Shambeh Shagazzay chokk ent. Shambeh Shagazz, Allabaksh Gaysay chokk ent. É mardomán nán pa waragá nabutag. Ali Guniay pet o pirokán dehkánkári kotag o say wahday nán pa azábé shóház kotag. Ali Guniay bonmál yakk kollé butag. Hamé kollay tahá áiá wati haptén bacch pédá kotagant. Randá tai Medhelkelásén lidhará Balóchestánay jangay poshtá mál o maddhi mocch kotag o Ali Guniá pa wat bán o bangolah bastag.
É sarjamén hándán bass yakk sérén dursyádé butag ke áiay pet o pirok cha shapokki károbáray ráhá sér butagant. Áiay nám Mir Jápar butag.
O dege man bass é goshtag ke yakk randé Mir Jápar sapará bit, Ali Guniay métagá cháhay hóthalá pa cháh o ápéá óshtit. Ali Guni hamódá nendók bit. Wahdé Mir Jápar cháh o áp kant o pa rawagá sar gipt, Ali pa sobáregá saláhé janty. Mir goshit ke marchi man dásht nakanán, bale démay haptagá jomahay róchá sobáregá tai kerrá káyán.
Ali zánt ke Mir gón wati gáth o paréthán mani garibi kollá sobáregá nayayt. Ali é róchán Wájah Náseray molkay sharik bit. Ali wati arzá Wájah Náseray kerrá bárt ke Mir jomahay róchá pédák ent, má tai molká peknek kanag lóthén. Wájah ennán nakant.
Jomahay róchá Mir gón wati sangat o gáth o paréthán kayt. Pasé koshag bit. Pasay ném sajji kanag bit o ném nárosht o beryáni. Warag gón maywah o sharábán mardománi démá ér kanag bant. Mir gendit ke sajjahén mardom gón sharábá warag waragá ant, bale Ali bé sharáb warag waragá ent.
Mir darráénit ke oo mani syád! May diwáná yakk habaré mahshur ent ke bé sharábá kabáb wassh naent o bé kabábá sharáb. Taw é kasánén pasay góshtá éoká mawar. Trondápá gotthé gotthé kashá beday gón godhá bechár ke pasay gósht chón wassh ent.
Chónáyá Ali sharábi mardomé nabutag. Bale é róchá Ali, Mirá ennán kot nakant. Ali sharr kabáb o sharáb wárt. Warag o charag halás bit, Mir gón wati mardomán rawt, bale Ali hamódá tagerday sará dán shapay sáhat 9 bajá wáb bit. Wahdé cha wábá pád kayt márit ke man shodig án. Tattarán bit o wati lógá rawt.
Baronkay sará nendit, wati janá tawár kant ke oo Názátun! Taw kojá mortagay marchi, jaldi kan mani shámá byár ke maná shodá kosht.’
Yakk baré Názátun paréshán bit ke Aliá chón ent ke áiá hejbar chó habar nakotag. Bale padá delá goshit balkén Ali gón Mirá báz dazgatth butag, nun damy bortag paméshká jezzh ent. Názátun goshádiá kollá rawt, cha drangá káshokén máhigay talá o kotaddánay sará érén lóhigá zurit ke sar atkagén batthy mán ant, Aliay démá kárit o éresh kant.
Wahdé Ali lóhigay dapá pach kant ta gendit ke lóhigá toshé batth o talé káshok mán, zahr gipt, lóhigá chest kant o pézhgáhá mány borrit o goshit ke sharáb o kabáb. Kabáb o sharáb. Kass gón sharábá sertagén batth o káshokén máhig nawárt. Padá wati jan o hamsáhegáni mát o gohárán názénit. Aliay lógay mardom sakk paréshán bant ke balkén Ali jennéá geptag paméshká bésoddén habar kanagá ent.
Aliay lógay mardom hamá damáná Wájah Náseray lógá rawant o áiá goshant ke goshád kan, molláé byár ke Ali jennéá geptag. Wájah Náser wati delá goshit ke Ali wa bégáhá salámat at o gón Mirá sharáb o kabáb waragá at, annun chón jenná geptag. Molláay áragay badalá Wájah Náser tachán tacháná Aliay lógá rawt ta gendit ke Ali wati kollay dapá óshtátag, pashk o shalwáry kasshetagant o batthay lóhigay tahá mány kotagant. Lóhigá gón godán mess janagá ent o kukárá ent ke sharáb o kabáb, kabáb o sharáb. Kass gón sharábá sertagén batth nawárt.
Wájah Náser áiay nazziká kayt, Aliá hakkal dant, kollá ráhy dant o kollá dhanná band kant o gón áiay lógay mardomán goshit ke eshiá hecch marg naent. É jenná nageptag. Eshiá marchi gón Mir Jápará petthé sharáb wártag, neshah ent. Sohbá hóshá kayt, wat sharr bit.”
Hótmán wati habará halás kant. Agan áiay segréth halás ent, dege segréthé rók kant, agan segréth hálás naent hamé segréthá damé jant o goshit ke man Dashtiay lidharay bárawá bass haminchok goshtag. Agan man koshagi káré kotag mani garden janagi ent.
Pésará Dashti o Hótmánay adh o kodh anchén jédhaháni sará butagant. Bale marchi esháni adh o kodhá sar dege jáhé kasshetagat. Nun gayrat o nangay habar at, janag o próshagay habar at. Shambehá nazánt ke man Dashtiá ché sar o sój bedayán.
“Annun mani sar hecch kárá naent ke ché bogoshán. Taw wati nókén lógá boraw. Man Goruay hálá gerán, padá tará pawn kanán. Chárén má ché kot kanén.” Shambehá gón Dashtiá gosht.
Bale Dashtiay delá naat ke nókén lógá borawt.“Ódá ham Hótmán maná jant.”
“Nun Hótmáná wati zahr wártagant.” Shambehá pawn band kot.
Shambehá yakkén wahdá wati hálay sará kandag ham áyagá at o gréwag ham. Á nazánagá at ke benendán o Dashti o Hótmánay adh o kodháni kessahán gósh bedárán yá wati janjálán gish o giwár bekanán.
(rawán ent)
Nóróz Hayát