Thébalay sará kahwáay némánén gelásé o talpachén ketábé ér ent. Darigay pardah pach ant. Darigay démay kánchá rókén ásay tekahén aksá posht drachké o drachkay sará neshtagén moragay bánzol rók ant. Róthekkay bránzán dir charchay mekkén mehter Issáay salib trepagá ent. Damká borzén mardománi rassh ent. Rawag o áyag ent . Hamé mardománi tahá kasé wadárchádhén dábéá charchay dapá kerréá jatagén laythay kambahá tekah ent o óshtátag.
Shalwáray pánchoky par naant, pashkay kálaray bokramy záher ent , kawshy sitagant o hákán hawár ant. Pád o zamin hamrang ant. Sabzén rangy lagoshtag, syáh tarretag o chammy sohr ant .
Cha áiay démá karnéay béwábiáni zhandi sahrá ent. Bázén pandán áiay bálád shampéntag, chó karzá ant. Borzén mardománi rasshay tahá rawók o áyokán chammy sakk ant. Anchó hirtiá cháragá ent goshay ke sakkén hirtén chizé patthagá ent . Kambahay borzá laythay peléthay sará do kapódar bál bandagá ent. Drájén damkay har do dastán darwázag ant o cha hamé darwázagán yakké némpach ent. Harkas ke gwazit o hamé némpachén darwázagá ke chammy kapant ta allam chakké jant o damáné mahtal bit o cha hamé némpachén darwázagá srokké kant o kambahá gón kapódar o boná wadárigén mardomá ke chammy kapant, murkán mojénit o poshtá mán dant.