Patangé bán o dayán pa taw bál zendagiá
Agán bozuray maná pa mesál zendagiá
Kasé cha kabray saruná dán omr pád nayayt
Nayatkag mortagén mardá hayál zendagiá
Kapódaréay kolaw gón atant bahárgáhá
É bágá poll nayárant chenál zendagiá
Tará cha pésh, cha taw pad edá ón rawwá ent
Padáni pól makant pádmál zendagiá
Nun mán gisshetagant malkamut o omr doén
Kamál margá kotag yá kamál zendagiá
Á darday chádh delay drikagáni tóká ent
Gón prosht o próshiá kárit damál zendagiá
Taw atkagay pa tará é napas man ér kotag
Babátagant nun wati máh o sál zendagiá
Padá ón dast chiá bárén kissagá nashotag
Má zántag harchi naent zarr o mál zendagiá
Gedáré atk o shapén omréay wadár rasént
Dobar dochár nakapt mahjamál zendagiá
Pa dróg o rást doén másagáni mestági
Jatag má nék o badén báz pál zendagiá
Negáhay alwatéá bramsh bétawár kotant
Padá nabut gón watá gapp o gál zendagiá
Cha pézhgáhá sawásán sará makant, magwazit
Na tawkalé ajalá, nay majál zendagiá
Delá mawar ke tará azhdeháén wahd mawárt
Zawálá áyagi ent kayt zawál zendagiá
Taw laddhetay o shotay Dád é jaháná ché
Manárá yár maras(e)tén é hál zendagiá
Aliján Dád