Rawant

Amir Dóst February 17, 2026 145 views

Yár gyábáná dar kapant o rawant
Kandán kandáná dar kapant o rawant

Zendagi grán, dam barant mardom
Chách bójáná dar kapant o rawant

Morg tai sabzazárén átrápán
Sawt shanzáná dar kapant o rawant

Chincho gráná rasant ezmay poll
Chincho arzáná dar kapant o rawant

Káyant emrózá áp mantáná
Ás tandáná dar kapant o rawant

Ach may diwáná cháderá chandhant
Yár malláná dar kapant o rawant

Tai zahir jengol ant, tahá lógay
Tarrán tarráná dar kapant o rawant

Dast hatamsázéay edá káyant
Poll sendáná dar kapant o rawant

Raptagénáni chamm estár ant
Dur ázmáná dar kapant o rawant

Ráchenén wahday gwánzagá mardom
Loddhán loddháná dar kapant o rawant

Chammay ápárá sháerén arwáh
Shayr jédháná dar kapant o rawant

Tai ganókán pa zendagi chié
Róch résáná dar kapant o rawant

Áshekén chamm Amir wati wataná
Wáb gendáná dar kapant o rawant

Amir Dóst

Hamrangén nebeshtag