Shomay Kaster Shambeh

Kesás máhé at Shambehá é jédhag chondhagá at ke pa wati é kárá kai dará bothokkán ke mani dardá bwárt. Áiá wadhé na wadhéá wati drostén sangat o aziz gón wat náráz kotagatant. Bass do say sangat sar atkagat. É abayd cha delréshiá hecch darday dawá naatant.
Anágatá Shambeh Mashkati mardoméay tránagá kapt ke darándhéhá áiay pajjárók butagat. Gón wat goshty, “Balkén hamé mard mani kárá bekant.”
É habaray kanagá rand goshay Shambeh cha galá bál but o hamá damáná pawny cha kisagá kasshet ke hamé mardá pawn kanán. Bale á kwahnén yátéá hakkal dát o gosht, “Oo Shambeh! Tará é marday dah dwázdah sálay pésaray habar yát naant? É mard wa pa wasshén del kassi kárá nakant. Tará Isopay katabá rasénit o nun tai kárá kant.”
Gón nákámén delé Shambehá wati dastay pawn kisagá kot. Bale damánokéá rand jawadhety, “Isopay katabá dege kánthé wa per nabit. Taw chónáhá watá Isopay katabá sar kotag.”
Goshay é habará áiay del kammé dhadhter kot. Áiá pawn padá cha kisagá kasshet o drostén pir o zyáraty tawár per kotant ke é mard pa árám o haywallái mani kárá bekant o gón man kaptagén habaré makant.
Pawnay ringá say randá thu thu kot, Albalushiá pawn chest kot. Na wat salámé dáty o na Shambehá salám dayagay móhy dát. Tachká tachk goshty, “Hán wájah, wati kárá bogosh. Taw ché lóthay? Shomay káré gatth mabit shomá hejbar mardomay hálá nageret. Man wa goshtag Karáchiay Balóch, bale shomá Balóchestánay Balóch wa Karáchiay Balóchán do dast démá et.”
Albalushiá dege bázén kaptagén habaré ham kot. Bale mani dast o del nagerant ke Albalushiay é habarán Shambehay kessahá nebeshtah bekanán.
Shambehá yabbaré wati delá jédhet ke bogoshány, “Oo Wájah Albalushi! Batalé hast ke majburiá mardom wati mátay yárá salám dant. Marchi tai kaster majbur ent ke tará pawná ent. Rástén habar esh ent, tai pawn janag wa durén habaré tai abélá gwazag ham rawá naent.”
Bale hamé damáná Shambeh é habaray tránagá kapt ke hél rawt bale ádat narawt. Albalushiá kaptagén habaray kanag ádat kotag. Nun hejbar é ádat cha áiay jáná dar nayayt. Tawe Shambeh mopte Hodá watá pa Albalushiay habarán géshter paréshán makan. Wati káray habará bekan sharter ent.
Shambehá gón pashalén gálewáré gosht, “Oo Albalushi! Maná Mashkatay wezeth wizáéay kár ent. Delmánag án Mashkatá byáyán, wati mát o jan o chokkán bolótháénán o begendánesh ke pánzdah sál bit nadistagant.”
Albalushiá shákáragé jat o gosht, “Pa taw wizá mocch ent. Bale taw maná wedheókálé bekan tará chárán, man nun tai rang shamoshtag.”
Shambeh kammé géshter pashal but ke man wassará wat é marday sará zahr atán. É mardá wa pa man zahir butag. Shambehá hamá damáná Albalushi wedheókálé kot, ta disty Albalushiá sharábay bótalé démá ent. Shambeh habakkah but. Haminchoká áiay dapá dar byatkén ke Albalushi taw wa pésará dege mardom sharábay waragá distagant, Eslámi lekchar dátagant, sharáb chincho harám ent. Marchi taw wat gón sharábá goláésh ay. Bale cha kaptagén habaráni torsá áiá hecch nagosht.
Albalushiá cha sharábay payká tengé gept o pa gal goshty, “Taw maná wati páspóthay póthóé o wati aksé Wathsapá ráh beday, man bándá tai wizáyá kasshárénán. Póshi byá Mashkatá.”
Shambehá zánt, é Albalushi naent, é sharáb ent ke marchi Albalushiá chosh habar parmáyagá ent.
Shambehá wati sar kechént o goshty, “Albalushi! Agan maná Amrikahay páspóth butén, maná pa Mashkatay áyagá wizáé pakár naat. Pákestán má wa zahr baráéntag, nun Pakestán maná páspóth nadant. Mani sar nákárén Repyuji Thraywal Dhákumenthá kaptag. Man tará Repyuji Thraywal Dhákumenth o wati aksé ráh dát kanán.”
Albalushiá cha payká dege tengé gept o gosht, “Bépegr bay. Hameshán ráh beday, tai kár bit.”
Damánéá doén hamósh butant.
Shambehá hámóshi prósht. “Mani kerrá nók kasshetagén póthó nést, yakk póthóé hast ke sálé bit man kasshetag. Hamé póthó sharr ent?”
Albalushiá kammok sharáb wati gelásá mán kot. Kandet o goshty, “Nagoshay taw Mashkatá pa máhéá wati chellién jan o mátay cháragá pédák ay, purah Mashkatiáni kerrá zámátiá pédák ay. Nókén póthó nálóthit. Tai kár kwahnén póthóay sará ham bit.”
Shambeh ganter pashal but o goshty, “Maná garibén Gazzoká kochekrozwái wati jenekk dátag. É Mashkati séth mani wadhén sharchizán kojá wati zámát kanant.”
Albalushiá wati payká kammok barp mán kot o darráénty, “Marchán Mashkati péshi Mashkati naant. Taw bass Amrikahay námá beger bahr nabay.”
Nun Albalushi Mashkatiáni baddhá kapt…
Shambehá watá mayárbár kot ke kár wa mani gatth ent, mopte Hodá bazzagén Mashkatiáni pocchok shódag buagá ant.
Áiá Albalushiay habaráni tahá dawr kot. “Albalushi! Byá tará mardoméay bárawá kessahé goshán. Márá syádé hast at, námi Dáktar Malgozár Sáheb…”
Albalushiá, Shambeh wár nadát ke á wati habará démá bebárt. “Dáktar Malgozár Sáheb Embibies (MBBS) dáktaré butag yá Piechdhi (PHD)?”
Shambehá nazánt ke Albalushiá ché passaw bedayán. Shambeh hámósh but. Albalushi ham hámósh but.
Damánokéá rand Shambehay chamm wati kóthiay ádénká kaptant, disty ke nun mani sar ták ent o péshánig krechkán geptag. Piriay torsá Shambehay hósh bargasht. Sahtoké béhál but ke man kai bárawá kessah kanagá atán. Goshay yakké áiay gósháni tahá kukárá at. “Oo Shambeh! Taw cha wahdá pésar pir butay!”
Bale Albalushiay tawár zórmand but, Shambehay hóshy barjáh kot. “Hán Shambeh, taw kojá shotay? Sharáb wa man waragá án, hósh tai shotag.”
Shambehá wati delá gosht hóshay wa dér ent, dém syáh ent. Bass zután maná Alsaymaray nádráhi magipt. “Pahell kan marchi man dah ganthahá mozzuri kotag, kammé dam bortag.” Shambehá passaw dát o padá wati hayály tátk ke man kai kessahá kanagá atán.
Albalushiá padá jost kot, “Godhá Dáktar Malgozár Sáheb Embibies (MBBS) dáktaré butag yá Piechdhi (PHD)?”
Shambeh gal but ke sharr ent Albalushiá padá maná jost kot. Agan josty makotén man chath béhál atán ke maná kai kessah kanagi at. Nun Shambeh goshád goshádá habar kanagá lagget ke padá béhál mabit:
“Dáktar Malgozár Sáhebá na Embibies kotag o na Piechdhi. Bass taw áiay kessahá gósh dár. Malgozár áiay awali nám at ke mát o petán per kotagat. Dáktar áiay domi nám at ke métagay mardomán per kotagat, parcháke á métagay awali kampódhar at. Sáheb áiay saymi nám at ke syási sangatán per kotagat, parcháke á yakk zamánagé Bienpi (BNP) Awámiay lidhar, Ehsán Sháhay hás o násén mardomé butag.
Bale báposhtá bazzagén Malgozár kassá é námáni sará tawár nakotag. Bass hamá wahdá kaséá Malgozár é námáni sará tawár kotag ke cha áiá káré butagy. Mesál, agan kaséá cha métagay sarkári hespetálá mopti penádhól o borópiné pakár butag godhá Malgozáry, Dáktar Dáktar goshtag. Agan kaséá cha Ehsán Sháhá nawkarié geragi butag, godhá Malgozáry, Sáheb, Sáheb goshtag.
Áiay báposhtay nám Malgozár Manus butag. Mardománi hayálá Malgozár baláhén manusén mardomé butag. Agan métagay mardomé pa káréá rahá butén, Malgozáry bedistén godhá allam wati ráhy táb dát yá hamá damáná wati káry kótá kot.
Marchán nazánán bale shánzdah habdah sál pésar may métagay ostád hamok máhay yakk táriká pa wati pagáray geragá Torbatá shotagant. Pagáray geragá rand áyán pa wati lógá ráshen máshen zortag o randá Golrang hóthalá gón kadhái o beryániá alkápén sobáregé kotagesh. Bale áyán modám yakk torsé delá butag ke má é róchá Dáktará mágendén. Torbatay gádhiáni estháp Sawlokay hóthalay démá butag. Dáktaray ádat butag har sohbá Sawlokay hóthalá cháhé wártagy o kárá shotag.
É habaray sháhediá nadayán, bale man eshkotag agan tankáhay róchá bist ostáday tahá toré yakké gón Dáktará dochár bekaptén, yá cha durá Dáktary bidistén bezán á róchá Neshnal Baynkay sesthom haráb butagat yá Torbatay shahrá artálé butagat yá ostádáni gádhi haráb butagat. Zalur maslahé na maslahé butagat.
Yakk randé may métagay gádhiwálá, Kiyoká gosht:
‘Yakk róché man Supiay hóthalá poterán ta gendán Másthar Mehrá, Másthar Hapiz démá kotag, sharr mány bastag ke taw é naksay badalá wati chellién jan goláésh bekotén sharter at. Balkén man o taw Supiay hóthalay káshokáni badalá Golrangá pasay kadhái waragá atén.
Man gendán ke Supiay Hóthal cha mardomán dapá dar atkag. Drostén mardománi chamm Másthar Hapizá sakk ant. Áiay dém sohr o shunz tarretag. Man tahá dawr kanán, ‘Hán Mehr! Ché butag? Taw bránz geptagay?’
Mehr passaw dant, ‘Yár jostá makan. Marchi sohbá kochekkán gut naritag, Hapizá, Malgozár Manus goláésh kotag. Manusiay asary gón wat Torbatá áortagant, Neshnal Baynkay sesthom haráby kotag. É nun may hál ent, máhay awali róchá sobáregá káshok o dhakkén nán waragá én o shapá batth o chathani bwarén. Man negbasarén Hapizá goshagá án taw Malgozár cha durá salámé bedátén, mashoténay goláésh makotén, balkén gón wat manusiay mazanén asaré nayáortagat. Chammán shánk day o bechár marchi métagay názákén ostád Supiay hóthalá káshokay sará ant. Bárén é bazzagán wápasiay keréh gón ant yá na. Nun taw wat maná bogosh ke Hapizá shábásh bedayán yá saráy benorodhán?’
Man hamá damáná zánt marchi Dáktaray manusiá wati kár kotag. Bale maná é habar Dáktaray sará laddhagi naat, man darráént, ‘Anchó é molk o anchó é molkay Neshnal Baynk… Taw mopte Hodá Dáktará bohtám janay.’
Nun Máshthar Hapizay démay sohr o shunzi kammé kamter bant, dely dhaddh bit o goshit, ‘Oo Mehr! Tará yát naent do say máhá pésar ham Neshnal Baynkay sesthom haráb butag, á róchá man wa Malgozár cha durá salámé dátag.’
Mehrá padá móhé rasit, ‘Godhá man hamé habará kanagá án na. Pagáray róchá taw haminchok cha Malgozárá dur bay, haminchok may wástá sharter ent. É róchá syáhén pesshié begend bale é mardá magend.’
Randá édege ostád gendant Mehr géshén kanagá ent, godhá yakk yakká habar kanagá laggant tánke Mehr, Hapizay baddhá makapit. Yakké goshit ke man Márchay máhá gón Malgozárá dhik wártagat, bale torsá gón shomá habar nakotagat. Má Torbatay ráhá atén, sahig butén ke Torbatá artál ent. Dege yakké goshit ke man Junay máhá Dáktar cha durá distagat, poshty per at, may gádhi Torbatay rahá shash randá haráb but o wahdé má Torbatá sar butén baynk band at. Dege yakké goshit ke Agastay máhá Dáktar mani chokká distagat o maná hály dátagat ke hayál bekan marchi man dáktar distag. Anchosh man Torbatay gádhiá sawár butagán gádhi óshtagi jáhá do randá panchar butag.”’
Albalushi delgóshay sará Malgozáray kessahá gósh dáragá at. Shambehá wati habar démá barán kotant:
“Hayr báz wahdá Kiyokay habar báwar kanagi nabutagant, parchá á yakk wazhgapp o taryáká palajén mardomé butag. Áiay ádat butag modám wati saparay bendát kanagá pésar taryáki dhekké wati lellekay chérá éry kotag o sajjahén ráhá zalur yakk do mardomay pocchoky shóshtagant tánke á wáb makapit o mardomán pa salámati wati menzelá sar bekant.
Bale man Dáktaray é kazáay sháhediá dayán ke áiay kessah Dáktaray gohárzatká wat gón man kotagat. 2002á áiay gohárzatk Torbatá nók nók Enjioéá kárá at o pa lahtén wahdá may kerrá hásthalá jalletagat. Áiá wati say chár máhay pagár chetant o yajjáh kotant ke pa wat nókén Baypár mótharsaynkalé zurán. Baypáray pádán métag o Torbat dur naant. Shapá hásthalá londháni pádunáni kapagay badalá wati chokkáni démá bán sharter ent.
Dáktaray gohárzatk kessah kant:
‘Yakshambehay róchá Mandá rawán, panjáh hazárá nókén Baypáré ke angat thél o áél kanag nabutag, bahá zurán. Móray gámá lógá káyán ke Baypárá hecch mabit. Cha galá sajjahén shapá wáb nakapán ke chón wati nókén Baybárá daptaray sangatán pésh bedárán. Domi róchá sohbá mahallah cha wábá pád káyán, jáné shódán o Baypará chálu kanán ke Baypár garm begipt o pa sapará tayár bebit. Sarsolónthoki do dapár nán o pyálahé cháh warán o cha chollá dar káyán ta gendán Dáktar gón mani mátá Baypáray kerrá óshtátag o habará ent, bale delgóshy gón mani Baypárá ent.
Mani del hamá damáná jant, Walid! Marchi tai Baypárá mát ent ke Torbatá pa salámati sar bebit. Taw báyad daptará pawn bekan o bogosh ke man tapig án, kárá atk nakanán.
Bale ché kanay mani sará nókén Baypáray táchagay ganóki sawár at. Man wati delá gosht, hayr bit.
Man áyáni kerrá rawán o pa nádelkasshi Dáktarárá salámé dayán o mátá ejázat kanán. Goshád goshádá Baypáray némagá rawagá laggán. Dáktaray tawár mani góshán kapit, ‘Walid Ján! Man Torbatá káyán gón, maná lahtén zaluri kár hast.’
Man wati delá goshán nun kalámá sharr jat. Jaldi jaldi drógéay sázagá laggán ke Dáktará bogoshán ke pahell kan nákó man marchi Torbatá rawagá naán, Mandá rawagá án. Bale damáná mani mát darráénit, ‘Sharr but, Walid Ján! Tará hamráhé raset. Nákó o gohárzatk habar kanán bet o Torbatá borawet.’
Man démá chakarrénán, mátá lónsoké dayán ke bezánt man zi panjáh hazár nagd pa é parpathá dátag o taw marchi wati brátá tán hadde Torbatá mani hamsapar kanay?
Bale mani mát maná kemár nakant, zánt man nimóné jódh kanagá án. Bass goshit, ‘Shomay sapar wassh bát.’
Wahdé Dáktar wati goháray habarán eshkont anchosh mani némagá kayt goshay gókéá kadhab distag. Man delay tahá dwá kanán, ‘Oo Wájahén Hodá! Marchi mani parpathay salámati o nákóay ezzat, doén tai porshawkatén dastá ant.’
Má doén dém pa wati menzelá rahádag bén.
Má kesás tán bist meletthá habar nakanén, dege bist meletthá kammé kammé habar kanén. Nun má Torbat nazzik kotag. Man sártén giné kasshán o gón watá kawl kanán ke agan marchi má pa salámati wati menzelá sar bebén, man panjáh kaldáray podani hayrát ka…’
Kawl angat mani dapá ent. Nókén parpathay posht o démay thayr panchar bant. Má zut zutá ér káén ta gendén parpathay posht o démay thayr zeminay sará patan pataná ér ant. Agan zobán kazá mabit doén thayrán kade bechilé tal mán.
Dáktar daggay doén némagán chárit, gendit ke may nazziká dege hecch mardom nést. Cha wati kisagá do hazár kaldár kasshit o mani kisagá mán kant o pa halwat goshit, ‘Doén hazárán bozur, kammé démá dokkáné hast, wati parpathá nókén thayr o thub mán bekan. Bale é wákiahay bárawá gón kassá habar makan. Taw zánay mardom locch ant, kalág geragá hecch mahtal nabant.’
Man wati kisagay zarrán kasshán o padá Dáktará dayán. ‘Dáktar Sáheb! Nun habar cha halwatá gwastag. Chedo pésar ke maná o tará pajjáróké gón nókén parpath o áiay dertagén thayrán begendit, géshter rozwá bebén, taw wati zarrán bozur o zut bekan Torbatay gádhié beger o boraw. Man watá thahénán.’
Dáktar hamá damáná gádhié gipt o dém pa Torbatá rawt. Man pa hamé gádhi o gádhiay mosáperán dwá kanán bán o mesteriéay dokkáná rawán.
Mesteri yabbaré mani nókén parpathá chárit o padá parpathay dertagén thayrán, randá maná jost kant, ‘É nókén parpathay thayr chón é paymá dertagant?’
Man passaw dayán, ‘Jostá makan. Bass maná pa sharrén kimatéá do nókén thayr o thub beday, tai báz mennatwár bán.’
Mesteri sarjamén kessahá nazánt ke ché butag. Á kammé zántkári pésh dárit o goshit: ‘Haw, marchán Baypáráni thayr Chini ant paméshká damáná derant.’
Man wati delá goshán marchi agan mani Baypáray thayr o thub Jápáni buténant ham dertagatant.
Mesteri Baypárá nókén thayr o thub mán kant.
Man mesteriay zarrán dayán o zut Baypárá sawár bán ke nun pa daptará dér bayagá ent. Man janán kekk, janán kekk, janán kekk, bale Baypár chálu nabit. Yabbaré maná imán yalah dant ke chó bit Baypáray enjenay dém ham syáh but. Mani hósh rawt, mesteriá padá tawár kanán ke mani Baypárá bechár ke chálu nabit. Mesteri ham donyáay kekkán jant, bale Baypár chálu nabit. Mesteri ham hayrán bit ke é nókén Baypárá ché but. Kammé jédhagá rand mesteri goshit ke balkén palagy sotkag. Nókén palagé mány kant, nun Baypár chálu bit. Dáktaray manusi chell meletthay tahá maná do nókén thayr o thub o nókén palagéay noksáná dant. Hamá róchá o rand man padá hejbar Dáktará wati parpathá sawár nakanán.”’
Shambehá wati kessah halás kot. Nazánty dege ché bogoshán. Wadáry kot bárén Albalushi ché goshit.
Albalushiá paykay áheri teng gept o pád atk, sharábay bótaly peréjá ér kot o barpy chollay kabátá. Trapunzet o goshty, “Pauuu! Wáki Dáktaray manusiá nabutagén kár kotag.” Atk watá kóthiay diwálá tekahy dát o nesht, padá habar kanagá lagget, “Taw wa wizáay wástá maná pawn kotagat, parchá Dáktaray kessah áort?”
Shambehá wa zánt ke man parchá Dáktaray kessah áort. Bale torsety ke agan bogoshány man pa tai habaray táb dayagá Dáktaray kessah áort, allam Albalushi padá Mashkatiáni baddhá kapit. Áiá hayál kot Mashkatiáni pocchokáni shódagay badalá wati pocchokán shódán, sharter ent.
Shambehá passaw dát, “Oo Albalushi! Taw habaré zánay, inchok dar pa dari o bazzagiá rand marchán maná wahméá geptag. Goshay mani pédákiay awali róchá man Dáktar distag. Nun hamá ent áiay manusiay asar maná yalah nakant. Man har káré kanán yá har chizé ke mani námá bit, á démá narawt.
Albalushiá kandet o gosht, “Gendagá marchi taw wati pocchokán ham shódag lóthay. Bekassh wati delay gakkán.”
Shambehá darráént, “Agan mani delay gakk buténant wa sakk sharr at, man gwátá dátagatant, bale zang ant, goshay hejbar sáp nabant.”
Albalushiá padá kandet o gosht, “Adhay Shambeh! Taw watá chó delprósh makan, agan tai delay gakk ant pakká gwátesh bárte, agan wáki zang ant byá Mashkatá, edá Saudi nazzik ent, tará ódá barán o tai zangán gón ápe zomzomá shódán.”
Shambeh sakk gal but ke marchi kaptahabarén Albalushi chó sharr habará ent. Áiá pa galé passaw dát, “É zangán ápe zomzom na, toré taw gón tézápá boshód, narawant.”
Albalushi kammé zahr gept o goshty, “Dáneshwari makan, wati kessahá bekan.”
Shambeh goshád goshádá habará lagget:
“Wahdé mani mát o petán sur kot, áyán tán bázén wahdéá chokk nabut. Áyáni suray dahomi sálá man pédák bután. Mani mát o pet o syád o wáres drah gal butant. Mani truá, petay gohárá gón mani mát o petán gosht ke man kawl kotag ke agan shomárá chokké bebit, man shomárá shomay námáni badalá chokkay pet o mátay námá tawár kanán.
É paymá mani pet “Shambehay pet” but o mát “Shambehay mát”.
É habará dah róch nagwast. Mani mát o pet sakk bimár butant. Mát rakket, bale pet sakidádén Hodáyá pa wat bort. Nun man nazánán é wayl cha mani sawabá but yá wat but. Bale man é harabá sharr zánán ke má sakk garib o wár butén. Parcháke na márá dege dayóké hast at o na petá mál o maddhié eshtagat.
Shábásh ent janózámén mátá ke pa may lápay shóházá wám o shámy kot o lahtén pasy báhá zort. Pasy gawr kotant. Pasán chokk o bar kot. Godhá mani mát wati manná kasánokén máldáré but. Tán dah dwázdah sálá may kerrá harwahdá sharrén pas hast at. Bale may sharterén pas Bélahié at. Bélahi kaddá borz o dráj o jáná porr at, góshy do do bechil atant. Sharzátén paséay drostén sharri áiay tahá mán atant. Wahdé zát, baré panch o baré sash shenekky áort.
Harwahdá ke áiay láp porr butag, gerákáni kolaw gón zarrán may lógá atkagant. ‘Golbibi! É randi bélahiay shenekké manig ent.’ Agan baré baré gerákéá bélahiay shenekké narestag, zahr geptag o goshtagy ke zi é janózámá nán pa waragá nést at. Marchi chár pasy hast, wati awkáty béhál kotag, sonthy nódán ent.
Bale man bazzagén mátay delay hálá sharr sahig butagán. Hejbar áiay sonth nódán nabutag. Har sohb á wat ladá shotag o pa pasán káh o buchy chetag o bégáhá mani sará nakketagy ke boraw pelániay molká ke sharrén esposty hast, pa pasán espost bahá bozur o byár. Agan é pas mabant márá shodé koshit.
Wahdé man cha eskólá chotthi kotag, wati ketáb o kápi o lawh páthay sará dawr dátagant, jaldi dapáré nán wártag. Górich butag sharr yá tabd o lewár, hamá damáná wati har pálám kotag o gón nákózatk o truzatkán dém pa espostay geragá shotagán. Wahdé má espost zortag, dém pa wati lógá rahádag butagén. Mani nákózatk o truzatkán wati mát o petay tawsip o tárip kotag. Yakkéá goshtag, ‘Dóshi may pas zátag, do shenekky áortag o ammáyá narén shenekk mani námá kotag. Shenekk may Aiday korbánig ent. Aidá pasay doén gond téwagá manig ant.’ Dege yakkéá goshtag, ‘May pas záhagi ent o petá gón man zobán kotag ke yakk shenekké tará dayán. Man wahdé shashomi jomáetá pás kanán, pasá zurán gón sangatán kawrá pekneká rawán.’
Bazzagén Golbibiay del dar atkag ke pasé na pasé wati chokkay námá bekant, tánke áiay chokk ham wati nakózatk o truzatkáni kerrá tawsip o taripé bekant ke máná ham pa námá passé hast. Golbibiá shenekk dar chetag o gehter o sharter kotag, mani námá kotag, bale man sawgend warán cha é shenekkán yakké ham tán máhéá gésh zendag nabutag.
Yakk róché mani sar cha nákózatk o truzatkáni tawsipá dhambart. Man zahr geptán o mátay kerrá shotán, ‘Ammán! Taw Nágománá bechár, áiay mátá do pas áiay námá kotag. Taw Tájá bechár, áiay petá say pass áiay námá kotag. Man mopte Hodá wati gondbon résh kotagant inchok haray sawári o pa pasán káhay áragá, bale angat maná pasé pa námá nést. Agan mani námá kotagén bélahiay shenekk merant, bélahiay jendá mani námá bekan. Agan bélahiá mani námá nakanay godhá man ched o rand pa pasán káh o buch nayárán.’
Bazzagén mátá sengé wati delay sará ér kot o goshty ke sharr marchiá rand bélahi tai námá ent. Man terrá terr but o shotán wati nákózatk o truzatk hál dátant ke agan shomárá do do say say shenekk pa námá hast, mani mátá málay bon, bezán bélahi mani námá kotag.
Mani hayálá máhé nagwast bélahiay láp dhambart. Má was kot, bale áiay láp sharr nabut. Lahténá gosht ke Saywanápy bedayet o lahténá gosht Balóchi dáru o darmány bekanet o lahténá gosht ke molláay kerrá nezarbandé begeret. Má Saywanáp o Balóchi dáru o darmán kot padá mátá gosht molláay kerrá rawán nezarbandé gerán, bale bélahiá pésará sáh dát. Man áiay jón lachá kot o Nehengay kawrá bort o dawr dát.
Cha hamá róchá rand man gón wat kawl kot ke nun man hecch chizay wáheshtá nadárán.”
Wahdé Shambehá wati kessah halás kot, lóthety ke chárán bárén nun Albalushi ché goshit, ta disty ke Albalushi wa nendokáni wáb kaptag. Áiá zánt ke sharábay chárén paykán Albalushi wati wadhá kotag. Áiá Albalushi náwallet o gosht.
“Hán Albalushi! Taw ché goshay bárén maná Dáktaray manusiay asar laggetagant yá man wat Dáktaray payméné án?” Shambehá Albalushi jost kot.
Albalushiá anchén passawé dát, áiá zánt ke Albalushi cha mani kessahay bendátá wáb butag.
“Mani samj kárá naent taw parchá Dáktaray kessah áort. Taw pa wati wizáyá maná pawn kot. Tai wizáyá gón Dáktará ché kár? Dáktar wati molká ent, taw Amrikahá ay o wizá cha Ómáná kayt.”
Shambehá goshag lóthet ke balkén tará é gwánzagi shumay wizáay kasshagá bázén tach o tágé kanag bekapit, bale hemmatá dawr maday. Maná allam wati mát o jan o chokk cháragi ant. Agan dege yakk o do sálá wati chokkán magendán mani chokk maná pajjár nayárant.
Bale Albalushiá pésará darráént, “Annun man wapsagá án. Mani sará géshter dard maday. Bándá tai wizáay wástá tach o tág kanán. Bale é habará yát bedár ke nun taw maná pawn makan, agan wizáay habar o hálé but, man wat tará pawn kanán.”
Shambehá gosht, “Yár Albalushi! Man báyad tará pawn bekanán o wizáay hálá begerán tánke wati saparay tayáriá kot bekanán.”
Bale Albalushi garrádhagá at.
Shambehá sardardi gólié wárt o wapt.