May zend o zendmán, rakkag o jonzag gón abramá bandók ent. Bé abramá zendag bayag nabiteni ent, chóke may áp, warag, gwát, sáh o édege gwájenáni pojjárénók o mósománi thahénók ent.
Zeminay saray hamok sahdár gón baniádamá hawár abramay nyámá zendag ent, drostáni zendmán har hálá gón abramá hamgranch ent. Pameshka abramay pahrézag harkasi zemmawári ent, pa émenén zendé o táhirbakshén mósománi nimóná.
Abram koj ent ?
Abramay masterén o brahdárterén dróshom tará mán kóh, kuchag, zer, drachk o dár o jangalán gendagá kayt. Abram sarzeminay hamok zendmáná barjáh dáshtag, á jangali zendmán bit sharr yá zeri zendmán, drost ant ke hawár wati kerdá adá kanagá ant, esháni pahrézag abramay pahrézag ent.
Zeminay hamok sahdárá gón domiá syádi o hamdardi hast. Daryáay nehengán beger dán hákáni tókay kermán dar á, hamok morg, hamok mór, hamok makesk yáke hamok dalwat o rastar pa yakk o domiá zendag ent, bezánke agan yakk záté táwán bwárt, sarjamén chágerd táwán wárt.
Bale bazhn esh ent ke baniádamay dastá abram sakk báz táwán waragá ent, chathá lagatmál bayagá ent. Lahté pa nazántkári abramá tawán dant o lahté pa zánt o pa shán.
Márá abramay pahrézagay wástá géshá gésh mardom sarpadi dayagi ant ke hamok jangali sahdár o drachk o dár pahrézagi ent. Chareshiá ikosestham (ecosystem) mánant, abramay hamwazani o hamsangi barjáh bit, chágerd wasshál bant, Zemin zébdár bit o mósom dhawldár bant.