Oo mani baht o kesmat o táleh
Byá tará wasshatké kanán dóstén
Taw mani zend o taw mani sáh ay
Taw mani dóstén ján o arwáh ay
Del mani band ent cha tai óstá
Cha tai dádán man ométwár án
Neshtag o chárán dán bebit róché
Gón tará mehray kessawán kárán
Oo mani baht o kesmat o táleh!
Taw agán rást ent del wati shoshtag
Cha mani hobb o dósti o óstá
Man wati del pa wáheshé bastag
Ke watá mehray háterá koshtag
Mehr zánt á ke mehrabán bitag
Yá shapi pásán páspán bitag
Nay badén baht o nay radén kesmat
Nay choshén shum o shánzdahén táleh
Ke maná éleng janant washnayatk
Ke mani “bámá Jawrakán dátag”
Chi mayár ent ke bitagán dhálchár
Cha tai pollén pattará, dér ent
Yá tará badwáhán sekén dátag
Yá mani hobbá del tai sér ent
Ke “mani bahtá nék bad gardant
Sór bant kandháni lodhén nókáp”
Gón maná zahr ant dái o sargwáp
Ke golén bánóré besingárant
Yá mani margay bazhn o jazhnáni
Deljamén mótk o zémeré byárant
É taén baht o kesmatay kár ant
(Ke) thithalén bójig ent shág morádáni
Dáem gón darkayl o gwarm o gwátán ent
Cha kojá lawhén nangaré byárán!
Dán kadi ómálán kanán ambáz
Dán kadi zergwáté padá chandhit
Náhodá ácháré kadi bandit
Del mani hecch paymá nadant gwáhi
Ke man morádáni menzelá gendán
Man satar kawl o másagán bandán
Yá wati jigay tánjawán sendán
Nést madáyáni wáhagán ásar
Nay pa man koll o nay bazén kápar
Nay dege pir o zyáraté eshtag
Hecch nakot molláay dam o bandán
Kamm nabant darday tirok o sózmán
Taw mani dard o taw mani darmán
Taw mani zenday godhsari armán
Oo mani baht o kesmat o táleh
Byá tará wasshatké kanán dóstén
G R Mollá