Master Wat Ay

Monir Dashti November 9, 2025 106 views

Poshtá gwazay, démá gwazay, master wat ay
Sengé janay, pollé janay, master wat ay

Báruthiáni rahbariá wassh bay
Márá wati master kanay, master wat ay

Pa matlabay daynán nakaptán chátéá
Alláh maná harchi dayay, master wat ay

Má pa watá ráhé dege chammán kotag
Taw pa dege ráhé tachay master wat ay

Taw bé nekábá dar kapay saylá raway
Pollé wati zolpán janay master wat ay

Ach taw gelagdárén delé, chó sarpad ay
Angat delay námá geray master wat ay

Márá tai hamsáhegi hecch wassh nabit
Márá wati dósté goshay master wat ay

Kóhén del o kóhén jagar érjig bant
Ásá agán sojdah kanay master wat ay

Man pa tará har band dág dátag wati
Taw pa dege yakké zaray master wat ay

Pa dozhmeni yá dóstiá zangáy janay
É Dashtiá harchi goshay master wat ay

Monir Dashti

Hamrangén nebeshtag