Taw sar geray yá jallay é jahán bass hamé mani
É zendagi ent pa merag nishán bass hamé mani
É wáhagáni jangalá kojá kojá má shot nabén
May tab bebit ta hóriá che kár yár kot nabén
É shap gwazit o sohb bit é zendagi wapá nakant
É washnayatkén nawbatáni wáb chammán ráh nakant
Berén merén pa wáhagán……. Pa wáhagán
Man hawr mantagán chó hoshk o kallarén dayáréá
Man kohsarán zahiré án chó pollén sarmacháréá
Chó wáb didagén delé hazánagá cha dar byayt
Nazánagáni mozz gón tai zánagá cha dar byayt
Rawán zendmán é ke pa kassá naóshtagi
Géchénagi ent márá ráh chó béwasá naóshtagi
Berén merén pa wáhagán……. Pa wáhagán
Kamálén béazábá kass marawt o jáhé sar bebit
É omray ném tai ke bit borawt o bé sapar bebit
É laybjáhá layb hast zahir hast o tir hast
É damkán békaráriay mabitén hecch pakir hast
Má bé hesábá Ádam o Hawáyá chó hesáb bén
É wahdá harkas ent kalam má chó pachén ketáb bén
Berén merén pa wáhagán….. Pa wáhagán
Zobán gón má gón bebit o dód may wati bebant
É kawr may, é gazz may, karód may wati bebant
Má bokk warán o sar janán zeray dán némá rastagén
Chó dard o thapp nabutagén ajab ke zahmá rastagén
Jahánay jahl o borzián bén zér o má zabar gerén
Cha pésh dar ke band bant darichahán cha sar gerén
Berén merén pa wáhagán….. Pa wáhagán
Kayá gón ják o jang bén kayá malám per kanén
Cha dar kapén zamánagá man o ke taw sapar kanén
É delnasaggén diriáni sarmatábén chandhagán
Wapáay keshká konthagén é ranjay ráh o kandhagán
Zahirigáni sáhatán gón yakk damé dochár bén
Padá mán sabzén sáhegán Golá chó békarár bén
Berén merén pa wáhagán….. Pa wáhagán
Áhug Gol