Goddhi Dánk
Dóshi pa shát o gal wáb nayatkag o angat ágah án ke har kondhá molláay báng o morgáni zémerén tawár botkag o mátén golzeminay dardchakárén bálád mán chammán sahrá o hónay jambar gwáragá ent, bale sadakk án é hónay jambar pa mani érdastén ráj o bandigén sardhagárá baháré kárit. É sáhatá ke man é chárén labzán kamáyagá án, yalén sangat mani kash o kerrán neshtagant o áyáni lonthán golábén bechkandé sraptag. Man ke é bechkandá gendagá án, mani ájuén margay talab waddetag o háthig nézór tarretag, bale chón kanán ke galay rahband o kamándáray gwashtagén dánkáni páband án.
Anchósh ke é sáhatá pa ájuén margay ambázá man watá gendagá án, chedo géshter mani hamgangaláni ópáray dámon chák ent. Á chó mani rangá hamé ométá mahtal ant ke bám beásit o kamándáray koloh bayayt o bogoshit "Hay kanet bélán shomay pa watan nadr buag o ráji maksaday pilaw kanagá sáhat hamésh ent, hay kanet bélán, hay kanet....." O pa wati mazanshánén maksaday pilaw kanagá dar bekapén.
Cha hamé nedáragá rájdóstiay bayrak borz o ájuén margay hóshámá márá gésh hinár kotag, pameshká chedo géshter labzay kamáyagá gésh tonn pa proshag eshtáp ent. Nun man wati goddhi dánká gón é shayrá ásar kanán
Hákay wazhbóá hawár én, padá wátarr káén
Jangay má kessahán kárén, padá wátarr káén
Jangay má kessahán kárén, padá wátarr káén
Shawray delband gawáh ent, má wati sar dátant
Ás pa dozhmená gwárén, padá wátarr káén
Ás pa dozhmená gwárén, padá wátarr káén
Má Morid én o zemin pa má goshay chó Háni
Eshká anchó má komár én, padá wátarr káén
Eshká anchó má komár én, padá wátarr káén
Hargwará sabz bant áshóbay golábén gwádhag
Retkagén hónay bahár én, padá wátarr káén
Retkagén hónay bahár én, padá wátarr káén
Ji pa áshóbay yalén bacchán, sarán baksháyant
Dóst o hamráhán mazárén, padá wátarr káén
Dóst o hamráhán mazárén, padá wátarr káén
Roksat ap, awáron sangatán. Roksat ap, awáron sangatán....
Salmán Hammal (Nótak)