Saymi dar
Balóchestánay Kessah
Har ensánáy kerrá kessahé hast. Lahtén wati kessahá wat kárit o lahténaygá degeré. Lahtén anchén kessah hast ke hejbar árag nabant.
Hamá ent ke man darándhéh án, Balóchestánay hamá mardománi kessah bochkahéá bastag o mani baddhá ant ke áyán wat áort nakotagant o márá pa áragá modám nimóné butag.
É Lallahay kessah ant. É Shamsátun Máhigiay kessah ant. É Maryam o Sájóayg ant. É Nákó Chákar o Nákó Golámay kessah ant.
Lallahá sarkár wati posht kot o tarret o hamá meskinén Balóch jatant ke áyán kawmay bazzagiay bárawá habar kot.
Lallahá modám gosht, “Borzá Allah ent o jahlá Lallah. Maná kay dast jat kant?”
Áiá é habar cháráháni sará haminchok géshter randá kot o mardom torséntant, pawjá áiárá do haminchok labb o lálech dát. Lallahá delay sérá Balóch latth o kotth kotant. Inchok médán gón máhigán nakotagat, do haminchok Lallahá gón wati kawmá kot.
Yakk róché ke Lallahay chokkay sur at o á sálónká tahtá baragá at ke bánóray petay kampánay gaythay dapá sarmacháráni bambay ámách but, gón wati chokk o gáth o parethán. Áyáni jón anchó thokkor thokkor butant ke zánag nabut ke kai jónay thokkor kai kabrá kall kanag butant.
Lahtén mardomá gosht ke báyad ent sarmachárán Lallahay bégonáhén chokk majatén. Áiay chokk Karáchiá wánagá at o baré baré gón Biesoay (BSO) sangatán ham nesht o pád atk. Áiá gón wati petay harábén kárán hecch kár nést at. Bale dege lahtén mardomá gosht ás ke kapit tarr o hoshk nachárit.
Lallah o áiay chokkay kóshay lahtén sálá rand Lallahay brát sarmachárán kosht o goshtesh ke é ham dalláré butag.
Áiay brátay kóshay panch sálá rand áiay brázatká wati métagá kerketh thurnamenthé addh dát. Áiá thurnamenth Balóch shahidáni námá kot. Baláhén baynaré jódhy kot o baynaray sará métagay koshag butagén sajjahén mardománi aksy jatant. Cha é mardomán lahtén pawjá koshtagat o lahtén sarmachárán. Sarmacháráni nezzá may koshtagén Pákestánay dallár butagant o pawjay nezzá may koshtagén Balóchay dallár.
Wahdé thurnamenth bendát but áiay sará bázén pawné atk. Lahtén pawnay mardomá gosht ke pelán shahiday aksá dur kan ke á sarmacháráni mardom butag o lahtén pawnay mardomá gosht ke pelán shahiday aksá dur bekan ke á pawjay mardom butag.
Áiá gosht ke man samáji johdkár o Mosolmáni chokké án. Eslámay ráh o rahbanday hesábá harkas koshag bit, shahidé. O samáji ráh o rahbanday redá taw báyad ent chágerday sajjahén mardomán yakkén nezará becháray. Man kassá dhálchár kanag nalóthán. Nun wa baynar tayár ent o thurnamenth ham bendát ent. Man chón é aksán dur bekanán? Bellet ke é thurnamenth drostén shahidáni námá ent. É thurnamenthá rand man hejbar dege thurnamenth addh nadayán.
Yakk bégáhéá laybi laybá bant, do mótharsaykali kayt, áiá chár tir jant o rawt. Róche maróchi kass nazánt ke janók kay atant.
Lallahay hándánay drostén mardén koshag butant. Bass ganókén nákózatké sar atk. Áiá sálay dwázdahén máhán bazén kóthé gwará at ke zemestáná mani kóthá hithar mán o garmágá aysi (AC). Inchok kosht o hónay gendagá rand áiá jánay shódag ham yalah dátagat. Goshty, “Marchán may chátá áp mán nést, hóny mán.”
Shamsátun Máhigiá chár mardénchokk hast at. Shamsátun o áiay mardá dehkáni kot. Áyán ábádén molké gón at. Cha molkay bar o samarán némesh wat wárt o némesh molkay wáhondárá dát. Yakk háménéá áiay mard macchay sará kapt o srény prosht o tahtay báhóth but.
Shamsátuná wati marday meragá rand máhig bahá kot o chokk láp dátant o ródént o sur o sáng dátant. Yakk chokkéá neshah kot o neshahán kosht. Do chokk pawjá bégwáh kot.
Shamsátuná wati métagá pendh o sendh kot, peryát o zári kot ke maná zarr o málé nést ke Torbat o Shál o Karáchiá borawán pa wati chokkáni bégwáhiá tawár chest bekanán.
Bádhaw battáyáni jam kanagá rand, Shamsátun Torbatá shot, Karáchiá shot o Shálá ham shot. Bale áiay chokk áju nabutant. Do sálá rand pawjá áiay chokk koshtant o dawr dátant.
Áyáni jón anchó sadhetagatant ke pajjárag nabutant. Áherá bazzagén mátá cha áyáni kawshán áyáná pajjáh áort.
Goddhi chokk cha Torbatá wati lógá áyagá at, sarmachárán ráh bastagat o pawj hamé wahdá pa sarmacháráni janagá atk. Jang bendát but, tiré áiay sará lagget. Á hamódá kapt o mort. Kassá nazánt kai tirá Shamsátunay chokk kosht.
Shábásh ent Shamsátuná ke latthay óstá at bale angat lóg pa lógá shot o máhigy bahá kot o wati mard o neshár o nomásagy láp datant. Godhsará áiay sréná hamradári yalah dát. Á ham wati marday wadhá tahtay báhóth but.
Mardom goshant Karáchiay dáktarán á anchén suchené jat, á padá wati pádáni sará óshtát o máhig bahá kanagá lagget. Bale á zendá báz móh nadát. Yakk shapé waptagén wábá mort.
Marchán áiay mard o neshár o nomásagán láp dayók nést. Nomásag lóg pa lóg warag pendhant o wati mát o piroká láp dayant.
Maryam o Sájó do zébáén gohár atant. Anchó ke rost o mazan butant, pa sur o sángá róché yakké áyáni lógay dapá atk. Maryam o Sájóay mát o petáni passaw esh at ke may chokk angat surig naant, wánagá ant, wahdé wati wánagá halás kanant, randá sur o sáng kanant.
Yakk róché métagay miray yakkén chokk Maryam o Sájóay lógay démá gwazagá at, áiá doén gohár distant ke chátá ápá atkagatant. Á, lógá shot o wati mát o pety goshtant ke mani gwájárá hamé sharrangáni lógá bebaret. Man allamá cha eshán yakké gerag lóthán. Mirá wati chokk sarpad kot ke é mardom cha má zátá kamter ant. Má gón eshán sur o sáng nakanén. Bale chokká wati pet láchár kot. Mirá wati chokkay gwájár bort. Maryam o Sájóay mát o petáni habar hamá atant ke pésará jatagatantesh.
Miray chokk é chizá béezzatié sarpad but o goshty ke man miray chokk án, é mardom chón maná nazurant.
Yakk róché Sawlokay hóthalay démá miray chokká Maryam o Sájóay pet záh o bad kot ke shomá kay et ke maná nazuret. Maryam o Sájóay brát hamódá nendók at. Brátá záh o badáni bér dát. Miray chokká wati topang kasshet ke bachakká koshán. Maryam o Sájóay brátá miray chokkay sará enzár bast ke man áiay topangá pach gerán. Hamé ger o chilá miray chokkay topangá ás bort o tir miray chokkay jendá, delay kallá lagget. Miray chokk hamódá kapt o mort.
Bachakk hamá damáná tatk o gár but. Miray mardomán yakkén róchá Maryam o Sájóay pet kosht. Bale angat miray del émen nabut. Áiá tarret o gosht ke mani yakkén chokkay badal hejbar pirén peté nabit.
Miray mardomán har shap cha durá Maryam o Sájóay lógay sará tirgwári kot. Yakk shapé kórén tiré Maryam o Sájóay mátá lagget. Áyáni mát ham mort. Miray del angat sárt nabut. Áiá tarret o gosht ke mani yakkén chokkay badal hejbar pirén máté nabit.
Áherá métagay mardomán hemmat kot, Kombélay Shayh pa paysalah kanagá áort. Shayhay paysalah é but ke Maryam pa sángá mirá dayag bebit o Sájó miray brátá. Maryamá suray awali shapá zahr wárt o watá kosht. Mir o miray brát suray say chár máhá rand sarmachárán koshtant ke dallár ant.
Lahtén mardomá gosht ke é kár Maryam o Sájóay brátá kotag ke maróchán gón sarmachárán gón ent.
Sájó némzendag ent. Róche marchi miray lógá móledi kanagá ent.
Nákó Chákar o Nákó Golám do brát atant. Petá doén kasániá sur dátant. Nákó Golámá hapt mardénchokk but o Nákó Chákará hecch chokk nabut. Nákó Golámá gón Nákó Chákárá gosht ke man gón lánchá Dabiá rawán. Taw mani poshpad o petay chárén dhagárán sambál. Nákó Golámá kesás chell sálá Dabiá kár kot. Nákó Chákárá áiay chokk ródént o Karáchiá eskól o káleján pa wánagá ráh dátant.
Wahdé Nákó Golám cha Dabiá penesh but o lógá atk, Nákó Chákará áiay kerrá zemini thokkoré lóthet ke pa wati kóthiay póiá cháté janán. Nákó Golám zahr gept o goshty ke man é zemin cha wati zarrán bahá zortag, man tará chón moptá bedayány?
Nákó Chákar ham zahr gept o goshty ke man chell sálá tai poshpad sambáletag o cha tará kaldáré ham nalóthetag, nun man do gaz zemin nakarzán. Cha hamá róchá o rand doén zahr ant o wat mán watá habar nakanant.
Hamé wahdá Balóchestánay jang bendát but. Nákó Golámay chár chokk kóhá jangá shot o say chokká gón syásatá kár nést at. Á wati métagay eskólay máshthar butant. Say chár sálá rand pawj métagay eskólá atk, Nákó Golámay sayén chokky bortant. Pawjá gón Nákó Golámá gosht ke wati sarmachárén chokkán bogosh salámi bebet, agan na má tai bégwáhén chokkán koshán.
Nákó Golám Nákó Chákaray kerrá shot o arz o peryáty kot ke man wa wati sarjamén zend Dabiá gwázéntag, man edá kassá nazánán taw wazir o gaziré beger ke mani chokk yalah dayag bebant, é bégonáh ant. Nákó Chákará yabbaré ennán kot. Padá áiay chálákén janá á sój dát ke wahd hamesh ent ke taw wati bérán cha brátá begeray.
Nákó Chákará gosht chón? Áiay lógiá gosht ke mani brázatk Dáktar Málekay páthiá ent. Taw wati brátá bogosh man gón Gránázay brázatká habar kotag. Gránázay brázatk wazir o gazirán geragá ent. Padá bogosh ke wazir o gazir goshant ke pawj kammé zarr lóthagá ent. Agan taw zarr bedayay tai chokkán yalah dant.
Nákó Chákará anchosh kot. Nákó Golámá wati drostén zarr kamm kammá Nákó Chákarárá dátant. Gránázá lahtén zarr wati pandólá jat o lahtén wati brázatkárá dát. Nákó Golámay zarr halás butant, bale áiay chokk yalah nabutant.
Áherá Nákó Golámá wati sarmachárén chokkáni kerrá arz o peryát kot ke wati seláhán chagal bedayet, agan na pawj shomay brátán koshit.
Chokkán zánay ché gosht? Goshtesh, “Abbá tará yát naent taw pa zeminé thokkoréá wati yakkén brát ke may petay hesábá at, zahr baráént. May wa sarjamén golzemin Pákestáná bortag, ma chón moptá wati zeminá bedayén?”
Dér nagwast ke chokkáni kamándhará seláh chagal dátant. Chokkáni kaympay ráshen máshen halás butant. Lahtén máhá rand do chokk pawjay démá salámi but. É doén chokk Shálá cha motharsaykaliáni tirgwáriá koshag butant. Yakk chokkéá cha kóhá wátarr kot o wati lógay konthá sádé basty o watá páhawy dát. Dege yakk chokké Bóláná janag but.
Sayén bégwáhén chokk pawjá koshtant o áyáni jón Morgápá dawr dátant. Nákó Chákar sarmachárán kosht ke dalláré butag. Nákó Golám cha wati chokkáni gamá kethán but o mort.
Shomay kasteray nimón wa Shambehay kessah ent. Goshay Shambehay kessah maná naylit ke damáné édege kessaháni granchán pach bekanán. Degeráni nimóná Hodá bezánt.
Godhá byáet Shambehay kessahay dege kárestéay némagá rawén. É kárestay nám ent Sayad.
Sayad, Shambehay pirok at. Áiay masterén bazhn esh at ke man parchá nawant. Sangatán modám gón áiá gosht ke taw watá pa é chizá mayárbár makan parcháke tai zamánagá métagá chónáhá wánagjáh nést at. Taw chón want bokotén?
Bale áiá gón wati sangatán gosht ke kórán wa Móltán dar gétkag, agan man wánagjáhé shóház bokotén balkén dar gétkagat. Áiá nazánt ke mani kasániá kamm o gésh sarjamén Balóchestáná wánagjáh nést at.
Áiá wánagay anchó shawk at ke harwahdá kalam o kágadé démay kisagá aty ke mardom bezánant man lekk o padh zánán. Modám áiay sangatán gón áiá maskará kot o gosht ke Sayad, agan kasé tará bogoshit ke pa man chizé nebeshtah bekan, taw ché kanay? Kandet o goshty ke cha mani démá zánag bit ke man wánendahé naán, kass maná jost nakant. Wahdé man kalam o kágadé kisagá kanán, bezán watá tasallá dayán.
Wahd gwazán but. Sayadá sur kot, chár chokky but, do bachakk o do jenekk. Awali mardénchokkay nám Morád at o domiay Bábá. Jenekkáni nám Dorbibi o Golbibi atant.
Morád o Bábá rost o mazan butant. Nun shakarwarná atant, omresh cha eskólay wánagay omrá gwastagat. Hamé wahdá Násrábádá pa bachakkáni eskólé pach but. Ostádán gósht ke má Morád o Bábáay omray chokk ham wánénén. Sayad gal but. Áiá wati bachakkán gosht ke man wa nawant, bale shomá bwánet.
Morádá wánagay hobb hast at. Áiá harróch sohbá mahallah har pálám kot o shot Násrábádá wánagá. Bale Bábáyá gosht ke abbá man nawánán. Man gón taw dehkáni kanán. Sayadá was kot ke chokk bwánit ke dehkániá hecch nap nést. Bale Bábáyá petay habar nazort.
Morádá panch jomáet want. Hamé wahdá eskól medhelé kanag but o say jomáety per but. Sayad gal but. Áiá gón chokká gosht ke géshter bwán. Bale hamé zamánagá Mashkatay pawj Kéchá barti kanagá atkagat. Moráday bázén sangaté bartiá shot. Morádá gón petá gosht ke abbá nun maná wánag bass ent, man rawán Mashkatay pawjá. Sayaday delá naat bale chokká gosht ke nun mani wánagay omr naent, káray omr ent o Mashkatay pawjá barti but.
Chizé sálá rand Morádá daynagé zemin bahá zort. Hapt bán góny bast o kampánáy kotant. Bánáni tahá do waty zort, do wati gohárán o yakké mát o petáy dát. Haptomi bán ke yakkerrá at, baythek o mehmánjáh at.
Pésará wat sury kot o randá wati kasterén brát o goháry sur dátant. Morádá do chokk but, doén sará baróbar naatant. Bábáyá chokk nabut. Dorbibiá do jenekk o yakk bachakké but. Golbibiá dán dérán chokk nabut. Sayadá lóthet ke Dorbibiay bachakk bwánit. Bale Sayaday é zámát dehkáné at, áiá gosht ke edá kass tai chokk o nomásagán nawkari nadant. Moptá wati chokkán pa wánagá bazzag makan. Belly mani yakkén mardénchokk dhagáráni sará maná komakké kant, mani kópag sobakter bit.
Nun Sayad géshter bazhnig but ke man nawant o mani chokk o nomásagán ham nawant. Bale á cha masterén bachakká razá at ke Mashkatay pawjá ent, mál o dawlat jam kanagá ent.
Bale áiá é nazánt ke masterén bachakk wati zarr o málán dege jágahé ham harch kanagá ent. Morád mazanén ayyáshé jódh butagat. Harwahdá ke áiay chotthi butant, á báré gón sharáb o jenekkán Táilaynd o baré Pelpiná mast o malár at.
Morád wahdé cha pawjá penesh but áiay zarr o mál kotthetant. Shapá wáb nakapt. Nun sharábay badalá theksileks dawáay sará but. Áherá ganók but o goshty ke Mashkatay kábus man án. Maná padá Mashkatá bebaret, mani taht o táj hamódá ent.
Goddhiá hecch darday dawá naat. Bass pa wati pirén petá Bibisi (BBC) sayrbin rajánky kot o petá baré baré kammok zarr dát, zarry theksileks kotant.
Nun Golbibiá Shambeh pédá kotagat. Shambeh shakarwarná at. Sayaday chamm Shambehá sakk atant ke allam Shambeh bwánit o démrawi bekant. Harwahdá ke Shambehá eskólay rawagá sosti kot, Sayadá hakkal o hókal kot. Shambehá wánagay hobb nést at bale pirokay torsá wánagjáhá shot.
Yakk róché Shambeh kerkethay laybá shotagat. Pa pasán káhy nayáortagat. Pas hamshám atant. Pirok zahrá porr at. Shambehá á shap sharr yát ent. Wahdé magrabtahárá kampáná potert, ta disty ke lógay sajjahén mardom pirokay bánay démá neshtag o wadárá ant ke Bibisi bendát bebit.
Shambehá mardom salám dátant. Drostán Shambehay salám alek kot, bale Sayadá hecch nagosht o pád atk o lógay pézhgáhá menokké chesty kot o dém pa wádhá shot. Bábáyá gosht ke petá chosh kot? Taháriá kay menokk mekk kant?
Shambehá zánt ke pirok zahr ent. Parcháke harwahdá pirok chokk yá nomásagéay sará zahr but, wahdé hamé mardomy dist, yakk na yakk káré dastáy kot o ném zahr káray sará o ném zahr hamá mardomay sará kasshetanty.
“Boraw komakky bekan, balkén kamter hakkal bwaray.” Mátá gón Shambehá gosht.
Shambeh dém pa piroká shot. Piroká maytiné dastá at o pa menokká kandhay janagy bendát kotagat. Shambeh hayrán at. Delá goshty wádhá menokk pakár naent, báyad ent piroká dege káré dastá kotén. Bale Shambehá hecch nagosht.
Shambehá gosht, “Pirpet! Taw boraw mardománi kerrá benend, Bibisiay wahd ent. Man wat é kárá kanán.”
Piroká darráént, “Mazanén mardom zahmat nakasshant! Mazanén mardom bázárá wadag bant!”
Shambehá lóthet ke dege habaré bekanán bale piroká padá darráént, “Kojá butagay marchi?”
Shambehá gosht, “Kerkethay laybá.”
É Shambehay zenday hamé dawr at ke áiá mazanén kertheth laybié bayag lóthet. Áiá lóthet ke pa Pákestánay kawmi thimá layb bekanán. Said Anwar o Salmán Bathy bayag lóthet. Áiay del pa pasán káh o buchay chenag yá molká gón piroká kár kanag yá eskól o Koránay wánagá per naat. Áiá gón watá gosht, é chiz maná naylant ke man sharrén laybié bebán. Man allam shap o róch kerketh layb bekanán dánke sharrén laybié bebán. Áiá nazánt ke Said Anwar o Salmán Bath Panjápay mardom ant. Man Balóché án, man áyáni jáhá sar but nakanán.
Sayadá dán kammokéá kandh kalóndhet o josty kot, “Layb kayá katthet?”
Shambehá pa bechkandagé gosht, “Má katthet.”
Áiá delá gosht nun balkén pirok maná hakkal madant ke má layb katthetag.
“Shomárá ché raset?”
“Hecch. Bass má layb katthet.”
“Zarresh nadát?”
“Eannán, pirpet.”
“Donyáay édege laybi pa zarr layb kanant. Mani nomásagá moptá jalén némróchá wati rózgár bortag. Na wánagá rawt o na pa pasán káh o buché kárit.” Piroká wati dapay moshók kasshetant o dege moshok dapá kot o goshty.
Nun Shambehá zánt ke pirok kamm kammá wati ragá rawagá ent. Áiá lóthet ke man zut habaré bekanán dánke pirok maná dege tahl o tropshén habaré magoshit.
“Pirpet, dér ent man káhay geragay jédhah gishéntag. Mardomé dar gétkag. Á pa may pasán káh gipt o kárit.”
“Wánagay jédhah ham gishéntag? Kay dar gétkag ke pa taw bwánit?”
Shambehá nazánt ke ché bogoshán. Á gong but o nimónéay sázagá lagget ke cha pirokay kerrá pád byáyán. É shátkámiay wahd ent ke má layb katthetag. Man báyad ent annun pirokay tahl o tropshén habarán gósh madárán.
“Káhay gerag o áragay kár taw Emokk Héruniá dátag. Gendán harróch panch shash lóthok cha káhán kamm ent. Marchi wa Emokkay jend gár ent. Bárén kojá sary chollá ent.” Piroká darráént o pád atk menokky zort o kallay tahá mány kot.
Shambeh chónáhá jédhagá at ke man nimóné besázán wahdé piroká gosht ke marchi Emokk Héruniá káh nayáortag godhá damáná goshty, “Pirpet! godhá man rawán Emokká dar géján.”
Nun piroká menokk kallá mán kotagat, dasty chandhetant o goshty, “Annun shapá métag pa métag bayagay badalá lógá nendag o pirokay sar o sójáni gósh dárag sharter ent.”
Agan pirén mardomé shakarwarnáéá sój bedant, é sój áiay yakk góshéá poterant o domiá dar káyant. Marchi ke Shambehá layb ketthetagat, á wa chónáhá sar o sóji naat. Delá goshty ke pirpet taw wati wahdá haráb makan. Annun man layb katthetag o atkagán, mani del o hayál bass laybay katthagay némagá ant. Taw satar johd bekanay, annun tai sar o sój mani delá nanendant. Maná bell ke rawán o Emokká dar géján, balkén pas hamshám mabant.
“Marchi man masitay mollá dist, goshty ke tai nomásagá kesás máhé bit wánagá áyagá naent.” Piroká moshóki tokké jat o gosht. “Taw pa wati wánagá ham Emokká ráh beday dánke tai wánagay jédhah ham begishit.
Shambeh zeminay chondhag o gón wat jawadhagá lagget ke mani wadhén shumbahtán shomá tori donyáay sharterén eskól o kálej o uniwarsethián dém bedayet man angat hamé shum bán o kayán. Moptá wati zarrán o mani wahdá zawál makanet. Bellet man kerketh merkethé kanán balkén sharrén laybié bebán.
Pirok kandhay bár dayagá lagget, goshty, “Péshay Balóchán goshtag macch macchá gendit rang bit.”
Nun Shambehá zánt ke pirok pakkáyá wati ragá shotag.
“Anun taw balkén bogoshay tai kerkethay sangat tai sharterén sangat ant. Shomá yajjáh kerketh kanet, yajjáh pekneká rawet. Bale é habará sharr bezán ke tai paymén chokké sohbá eskólá, némróchá masitá o bégáhá pa pasán káh o buchá shotag, bale marchán masitay démá nagendit o pasáni káh o buchay zarrán hérunián dant, godhá bezán ke taw cha wati harábén sangatán rang zortag.”
Shambehay sar jahl at o mell janagá at. Pas peléngagá atant o pirok habará at.
“Taw Dáktar Mobárek o Wájah Mahmadá zánay?” Piroká menokkay kandhay bár dayag halás kot o gosht.
Shambehá wati sar sorént ke haw, eshán zánán. Bale Shambeh nazánagá at ke pirok parchá esháni námá geragá ent. É wa gón man kerketh nakanant.
“É doén nákózatk ant o may molkay mir o motaybar ant. Bale marchi harkas Dáktar Mobárekay ezzatá kant ke á dáktaré, bale kass Wájah Mahmad salámé ham nadant.
Wahdé é doén Karáchiá wánagá shotant. Nawantesh gón radén sangatán gón kaptant o wati zarresh zut halás kotant. Eshán wati lógay mardománi sará kolaw ráh dát ke may zarr halás butagant. Mobárekay mátá gón chokkay zarráni hamráhiá kágadé nesbeshtah kanáént o ráh dát ke man tai raptagén petay thokkoré zemin bahá kotag o pa taw zarr dém dayagá án. Agan taw mawánay tará wati janózámén mát o raptagén petay hakk gerant. Agan taw pa del o setk bwánay o Hodáay kerrá arz o peryát bekanay, Hodá tai nékén wáhagán purah kant, tará kár o rózgáré rasit.
Mobárek hamá róchá o rand bésáhegén drachkéay chérá nesht o wanty o cha Hodáyá dwáy kot. Marchi á dáktaré. Bale Wájah Mahmadá bénapén sangat yalah nadátant, marchi Násrábáday hóthaláni démá neshtag kochekki tháng próshit. Belly mir o motaybari chokké bale kass cháhéay saláhy ham najant.
Agan taw hakk o del bwánay Hodá tará zalur jáhé na jáhé sar kant. Agan kerkethay sangatáni randá kapay tará janózámén mát o raptagén petay hakk gerant.”
Shambeh pirokay é habarán sarpad bayagá naat. Áiá jédhet ke wáki man chórahé án bale mani mátá hejbar pa man zemin bahá nakotag o máná Karáchiá wánagá dém nadátag. Parchá maná janózámén mát o raptagén petay hakk begerant.
Pirokay tahl o tropshén habar angat halás naatant. Shambeh paréshán at ke pirok satar zahr butag bale hejbar choshén habary nakotag. Marchi bárén piroká chón ent…?
“Taw Séth Rahimdádá zánay?” Piroká padá Shambeh jost kot.
“Hamé Rahimdád ke gón wati dahén chokkán jahlay kabrestáná kall ent?”
É randi Shambehá sar nasorént. Áiá pirok jost kot. Parcháke cha kasániá Shambehay ádat at harwahdá ke kabrestáná wati petay kabray cháragá shot godhá métagay édege mardománi kabray shakky wantant ke kay kadi mortag o chón mortag.
Piroká passaw dát, “Haw, hamé Rahimdád. É mard may damagay sérterén mardom butag. Eshiá darzené mardénchokk butag. Rahimdádá cha Éráná sámán lótháéntag, Karáchiá bahá kotag o cha Karáchiá sámán lótháéntag, Éráná bahá kotag.
Mardom goshant zánag nabit ke kadi Hodáay latth mardomá laggit. Anágatá Séthay chokk wat mán watá adhant. Yakké goshit taw petay zarrán áshekiay poshtá zawál kanagá ay. Yakké goshit taw petay zarrán neshahay poshtá zawál kanagá ay. Chár panch chokk wat mán watá jang kant, yakk o domiá koshit. Édegerán neshah koshit. Godhsará Séthay károbáray dém syáh bit. Wahdé Séth merit áiay lógá kambalé dar nayat pa áiay jónay per dayagá.
Oo mani nomásag! Hodáay latth nazánt ke kaséá darzené chokk hast yá yakké, chórahé yá mát o pety hast, garib o nézgáré yá sér o hastómandé. Agan áiá Hodáay latth laggagi ent, laggity.”
Nun pas géshter peléngagá atant o Shambeh gón wat rapathagá at ke pirok wati rabbá bechár dege Hodái latthé mani sará maday. Chónáhá shumén bahté mani sará kaptag ke mani námá butagén dalwat merant. Dege Hodái latthé man kojá sagget kanán.
Shambehay pirok angat habará at, anágat pézhgáhay mardomán kukár kot, “Bibisi goshagá ent ke marchi Gwáderá lahté Chini kársáz koshag butag. Sarmachárán é wákyah kabul kotag. Nun pakká Balóchestáná mazanén jangé bendát bit.”
Pirokay hayál theglet. Áiá wati gapp óshtáréntant o dém pa pézhgáhay mardomán shot.
O Shambeh cha kampáná dar atk o dém pa Emokkay shóházá shot.
(Rawán ent)
Nóróz Hayát